Со една минимална и една просечна плата во Македонија не може да се наполни ниту една потрошувачка кошница. За една година таа е потешка за речиси 17 илјади денари. Но тие пари се само за храна и сметки, без кредити. Во регионот Црна Гора има највисоки плати, а Србија најниска потрошувачка кошница.
За да го протурка октомври, на едно четиричлено семејство за храна, сметки за домување, по некој скромен денар за облека и обувки и лекови му требале 51.514 денари, пресмета Сојузот на синдикати (ССМ).
Минималецот во земјава е 18 илјади денари или речиси 300 евра, просечната плата, пак, за август е 31.871 денари или 520 евра. Значи на семејството кое заработува една минимална и една просечна плата ќе му фалат уште 26 евра месечно за да „врзат крај со крај“.
Многу сложена математика е потребно за да се протурка месецот, вели 38-годишната Симона од Скопје.
Тоа што е економист по професија малку ѝ ги олеснува пресметките. Прво се плаќаат сметки, но тоа во зима оди малку потешко, па се случува плаќањето на некоја сметка да се пролонгира и за две недели. На сметки за струја, вода и телефон месечно им одат од 8 до 10 илјади денари. И таа и сопругот имаат по еден кредит. Во потрошувачката кошничка на ССМ нема ставка за кредити.
„Двајцата синови одат на фудбал и кошарка, за која услуга месечно плаќаме 50 евра. Двете деца земаат ужинка на училиште, тоа чини месечно 800 денари, но има денови кога големиот син кој е 7 одделение сака да купи нешто дополнително, па секогаш со него си носи минимум 100 денари“, вели Симона.
Семејниот буџет се троши и за родендени на другарчињата од школо, а поголемиот син понекогаш оди на кино за што му се потребни од 300 до 500 денари. Со сопругот одамна се откажале од излегувања и ресторани, а Симона вели дека пешачи или со велоспиед оди на работа за да заштеди.
Повеќе на РСЕ
