Врховниот суд одлучил да го одложи издржувањето на затворската казна за Гордана Јанкуловска која е осудена на 4 години затвор за „Тенк“.
Од Судот соопштија дека одлуката на Врховен мора да се почитува, и покај одлуката на судија за извршување санкции од Кривичниот суд Јанкуловска на 1 јули да замине на издржување на затворската казна.
„Врховниот суд до Основниот кривичен суд – Скопје достави решение со кое барањето на Гордана Јанкуловска осудена со пресуда на Основниот кривичен суд и со пресуда на Апелациониот суд за „Тенк“, за одлагање на извршувањето на казната – се уважува.
Во решението е наведено дека, извршувањето на казната изречена со пресудата на Основниот кривичен суд – Скопје од 08.10.2018 година, а потврдена и преиначена во делот на казната со пресуда на Апелациониот суд –Скопје од 25.03.2019 година со која Јанкуловска е огласена за виновна за кривичното дело „Злоупотреба на службена положба и овластување“ и осудена на казна затвор во траење од 4 години се одлага се до одлучување по поднесените барања за вонредно преиспитување на правосилната пресуда од страна на Врховниот суд на РСМ“, пишува во соопштението од Основен кривичен суд – Скопје.
Гордана Јанкуловска како поранешен министер за внатрешни работи беше осудена на 6 години затвор за случајот „Тенк“, но по жалбата во Апелација, затворската казна и беше намалена на 4 години затвор.
Врховниот суд нема законски рок во кој би одговорил на барањето за преиспитување на правосилноста на пресудата. Се дотогаш на сила е одлуката Јанкуловска да не оди во затвор.
За случајот „Тенк“ Груевски е осуден на две години затвор, а поранешниот помошник-министер во МВР Ѓоко Поповски е осуден на шест години и шест месеци затвор. На Поповски Апелацискиот суд му ја намали казната на 4,5 години.
Извор:НоваТВ
