Може ли пензискиот систем да се спаси од крах со зголемување на старосната граница за пензионирање? Фискалниот совет предлага таква мерка, велејќи секоја година бројот на пензионери е поголем за најмалку 1.500 нови, а иселувањето на младите ги намалува приходите во Пензискиот фонд. Синдикатите се жестоко против.
Одржувањето на Пензискиот фонд на Северна Македонија е под ризик поради трендовите на стареење на населението и емиграцијата на младите, поради што е потребно зголемување на старосната граница за пензионирање. До овој заклучок дојде Фискалниот совет – независно државно тело формирано од Собранието што изработува анализи за фискалните претпоставки и фискалната стратегија.
Се предлага од 2026 година да се зголеми старосната граница за пензионирање на 67 години за мажи и за жени.
„Доколку не се преземат итни мерки, пензискиот систем може да стане неодржлив, што ќе доведе до дополнителни фискални ризици“, предупредуваат од Советот.
Засега овој предлог за следната 2025 година не е усвоен во Собранието, а Владата наведе дека во моментов не размислува за зголемување на старосната граница и дека прават се за да ја стабилизираат состојбата во Пензискиот фонд.
