Богат архајски гроб од 6 век пред новата ера со златни, сребрени и бронзени предмети, слични на гробивите со златни маски од Требенишкатата некропола открија археолозите во селото Корошишта, близу Струга. Засега во гробот се регистрирани 80 наоди.
– Во рамки на гробната целина откриени се бронзен шлем; златни прстени, килибарни и стаклени перли; златни фолии со различни форми и декорација; сребрени игли; бронзен сад за вино; сребрен кантарос; бронзени чинии и други кои подоцна ќе бидат конзервирани и претставени пред јавноста – рече археологот Перо Арџанлиев раководител на истражувањата, на прес-конференцијата што тукушто заврши во Заводот за заштита на спомениците на културата и музеј во Охрид.
Локалитетот денеска го посети министерот за култура и туризам Зоран Љутков. Во просториите на Заводот и музеј во Охрид беа претставени најновите археолошки откритија во Охридско-струшкиот Регион.
– Овој голем научно-истражувачки успех не само што фрла нови светла на археолошката историја на нашата земја, туку и претставува значаен придонес во европското и светското археолошко наследство. Некрополата е од архајскиот период (6 век пр. Христа), која по многу нешта наликува на далеку попознатата Требенишка некропола која е во непосредна близина. Во рамките на гробната целина регистрирани се околу 80 наоди, од кои дел се пред нас. Откритијата се резултат на последните археолошки ископувања кои го осветлуваат животот на цивилизациите што оставиле траги од минатото, но чија култура и влијание се и понатаму значајни за нашето разбирање на историскиот контекст – рече Љутков.
