ВМРО-ДПМНЕ во програмата, меѓу другото, вети 500 нови вработувања во здравството и 50 нови методи во првите 100 дена. Здравството е во хаварија, хируршките сали едвај функционираат, Онкологија е пред колапс…Министерот Таравари ги почна промените во ресорот со разрешувања и смена на директори.
Кога на 24 јуни неврологот Арбен Таравари по вторпат седна во министерската фотелја во ресорот здравство (кратко беше на истата функција и 2017) на маса доби пациент за реанимација. Вака лекари и здруженија на пациенти ја опишуваат моменталната ситуација во здравството на почетокот од мандатот на новата влада – која пак, вети ефикасен, ефективен и достапен здравствен систем чиј центар ќе биде пациентот, како што пишува во владината програма за работа што премиерот Христијан Мицкоски ја достави до Собранието.
„Речиси сме во хаварија во здравствениот систем, како и во повеќето институции во нашата држава. Кога нешто е во лоша и тешка ситуација, за мене секогаш е предизвик да се влезам и да се обидам да помогнам колку што се може“, рече Таравари на 18 јуни во интервју во емисијата „Топ тема“.
Повеќе на РСЕ
