Нема одговoрност за случаите во кои државата треба да плаќа милионски отштети поради склучување лоши договори со компании или нивно прекршување. Експертите велат дека има општа амнестија при ваквите случаи, што ја разгорува корупцијата.
Никој не презема одговорност за тоа што Македонија плаќа милионски суми отштети поради склучување штетни договори за државата или нивно прекршување. Така на пример, за купопродажниот договор за рафинеријата ОКТА, државата сега треба да и плати 21 милион евра на грчката компанија „Хеленик Петролеум“, бидејќи не го испочитувала договорот потпишан во 1999 година. Со него земјава се обврзала годишно да купува по 500 илјади тони грчки мазут, иако немала потреба од толкава количина.
Но ова не е единствениот штетен договор за кој државата сега треба да плати огромна сума од буџетот, или поконкретно, од џебот на граѓаните. Околу 8 милиони евра отштета веќе побарала италијанската фирма што требаше заедно со две македонски фирми да го гради новиот Клинички центар вреден 72 милиони евра. Ова го потврди и самиот министер за здравство Беким Сали, кој најави дека се обидуваат да стапат во контакт со фирмата, за да разговараат за сумата. За новиот Клинички беше потпишан договорот, ископана една дупка, и работата застана со промената на власта.
Лани на пример, за неисплатената дезинфекција на поплавено Стајковци од пред шест години, ова Министерство требало да плати два милиони евра, од кои голем дел отишле за извршители. Освен овие пари, во изминатите две години Здравство само за извршители дало околу 150 илјади евра.
Повеќе на РСЕ
