Специјалниот претставник на Владата во разговорите за решаваање на проблемот со Бугарија, Владо Бучковски, на денешната прес – конференција со министерот за надворешни работи Османи, изјави дека е убеден дека ќе се најде решение, но тоа можеби нема да се случи во наредниве седум дена.
– Можеби ќе биде потребно дополнително време, но сме на вистинскиот пат. Јас заради моето искуство нема да прифатам со нашите бугарски пријатели да ги испраќаме пораките преку медиумите – рече Бучковски.
Тој вели дека до последен момент ќе се бори за да се изнајде решение.
– Јас се надевам дека со моето искуство, со довербата која ја имам и во бугарската јавност, ќе бидам јасен сигнал на посветеноста на нашата Влада во исполнувањето на преземените обврски од Договорот за пријателство и соработка. Со задоволство го прифатив овој предизвик затоа што сум убеден дека можеме да стигнеме до решение кое ќе го деблокира процесот, а од друга страна ќе биде во духот на европските вредности со целосно почитување на нашето достоинство – вели Владо Бучковски.
Министерот за надворешни работи, Бујар Османи изјави дека со ваквиот чекор се пополнува дипломатската празнина, бидејќи немаме назначено амбасадор во Софија.
– Создаваме низа механизми за да ја засилиме довербата меѓу двете земји. Работиме и на дополнителни форми на акциски планови за суштински да покажеме намери да ја засилиме улогата на Договорот за пријателство, неговата ефикасност и имплементација – рече Османи.
Извор:НоваТВ
