Против 14 лица од Куманово и од Скопје и четири фирми се поднесени кривични пријави поради основано сомнение дека сториле повеќе кривични дела од 2011 до 2017 година. Меѓу осомничените се вработени во општината Старо Нагорачена, директори на три основни училишта и приватни фирми кои се товарат за „злосторничко здружување“, „злоупотреба на службената положба и овластување“, „употреба на исправа со невистинита содржина“, „злоупотреба на постапката за јавен повик, доделување на договор за јавна набавка или јавно-приватно партнерство“.
Со ваквите дејствија го оштетитиле буџетот на државата за износ од 39.815.609 денари или за повеќе од 600.000 евра – пари кои ги добиле како блок дотации од Министерството за образование за превоз на ученици.
Истрагата покажала пријавените организирале група и ја злоупотребиле постапката за јавен повик со склучување на договор за јавно – приватно партнерство, изготвиле фалсификувани договори и на тој начин овозможиле правните лица да ги исполнат условите предвидени во тендерската документација.
Исто така истрагата покажа дека при користење на возилата за превоз на ученици за други намени, ги игнорирале претходно склучените договори за превоз, одобрувале и потпишувале фактури за извршени превозни услуги поединечно за секој месец со непрецизирани податоци без наведени релации, без број на ученици со многу повисоки фактурирани цени од договорените.
Извор:НоваТВ
