Во државава утрово заврши најдолгиот, 85 часовен, карантин кој граѓаните ги затвори дома за време на Велигден. Ефектот од ваквите рестриктивни мерки чија цел е спречување на ширењето на ковид-19, властите го очекуваат на почетокот на мај, за кога најавуваат дека ќе почне и олабавување на некои од нив и враќање на животот во нормала.
Бројот на излекувани пациенти од коронавирусот во нашата држава достигна 200, откако вчера имаше повеќе излекувани – 21, од новорегистрирани случаи – 18. Вкупниот број на заразени е 1.225 лица, досега починаа 54, а направени се вкупно 12.133 тестирања. Ќе се зајакнуваат меките мерки за да не мора да се заоструваат рестриктивните.
Спасовски: Излечените се мотив плус да продолжиме во спречувањето на ковид-19
Премиерот Оливер Спасовски на Фејсбук објави дека 200 излечени наши граѓани од ковид-19 е вест што дава дополнителна мотивација да се продолжи со заедничките напори за справување на ширењето на коронавирусот.
„Регистриравме и ден со поголем број излечени од новозаразени. Тоа е резултат на големата, огромна посветеност за здравствените работници и на граѓаните што се придржуваат до мерките на претпазливост. Тие ги заслужуваат најголемата благодарност и сите признанија“, вели Спасовски.
Властите препорачуваат граѓаните да го редуцираат излегувањето од своите домови,и тоа само од најнеопходни причини, заради одење на работа, како и излегување од својот дом на само еден член од семејството заради купување намирници и лекови од маркетите и аптеките.
Од денеска забрана за организиран превоз на патници кон и од Тетово
Од денеска се забранува организиран превоз на патници, односно забрана за влез и излез во и од подрачјето на Општина Тетово и сите околни општини.
На Клиниката за инфективни болести и фебрилни состојби во Скопје вкупно се хоспитализирани 56 пациенти од кои 18 се на кислородна поддршка, а тројца на механичка вентилација.
Во ГОБ „8 септември“ се хоспитализирани 34 потврдени и суспектни пациенти. Со потешка клиничка слика се девет пациенти, а шест се на респираторна машина.
Во болницата во Битола се хоспитализирани 14 пациенти потврдени и суспектни на ковид, а на домашно лекување се следат уште 15 пациенти.
Во штипската болница во моментов се лекуваат пет ковид позитивни пациенти, сите во стабилна состојба, а на домашно лекување се следат 19 пациенти, информираат од Министерството за здравство.
NovaTV
