На денешното отварање на аеродромот Истанбул во Турција присуствуваа голем број на претседатели и представници на држави.
Ердоган на патот до салата во која се одржува церемонијата ги поздрави бројните гости од различни делови на светот, меѓу кои беше и македонскиот претседател Ѓорге Иванов со сопругата Маја Иванова.
По групното фотографирање гостите се префрлија во свечената сала.
Претседателот на Бугарија Румен Радев утре ќе ја посети Македонија, при што ќе оствари средба со македонскиот претседател Ѓорѓе Иванов.
Според Радев, спорот за името треба да биде решен во полза на Македонија, Грција и Бугарија.
– Бугарија секогаш се стремеше да и помага на Република Македонија и дел од таа помош е ние да не бидеме пречка, да не го оптоваруваме овој спор, кој треба да се реши меѓу Македонија и Грција. Во тој поглед, може да се смета на нас. Но јас верувам дека овој спор ќе биде решен на таков начин што нема да влијае на интересите на ниту една од овие три држави. За нас тоа значи во името да нема географски одредници кои содржат делови од територијата на Бугарија. Затоа ќе бидеме во контакт со македонските власти за да се најде решение на најдобар можен начин – изјави Радев за бугарски медиум.
Радев во земјава доаѓа со двајца митрополити од Бугарската православна црква, пловдивскиот митрополит Николај и старозагорскиот митрополит Кипријан. Радев со тоа ќе биде прв претставник на бугарската држава која при посета на Македонија во делегација вклучил и двајца претставници на црквата. Притоа вели дека тој упатил покана до БПЦ да биде дел од посетата, но за прашањето дали БПЦ ќе прифати да биде црква –мајка на МПЦ-ОА вели дека е во ресорот на црковната дипломатија и прашање по кое ќе одлучат двете цркви.
Вчера стапи на сила Договорот за добрососедство и соработка со Бугарија. Договорот беше потпишан на 1 август 2017 година од страна на премиерите на двете држави, Зоран Заев и Бојко Борисов, заради зацврстување на меѓусебните пријателски односи, унапредување на добрососедството, развивање на сестрани меѓусебни односи, согласно меѓународното право.
На агендата предвидена е и средба на Иванов и Радев со претставници на стопанските комори од Република Македонија и од Република Бугарија.
Радев ќе престојува во дводневна официјална посета на Република Македонија. Тој во земјава пристигнува на покана на претседателот Ѓорге Иванов.
Извор:НоваТВ
Во Собранието на Република Македонија денеска на дневен ред е Законот за употреба на јазиците, во трето читање, кој беше вратен од страна на претседателот на државата Ѓорге Иванов без потпишан указ и со бројни укажувања.
Официјалната бројка на амандмани е 35.573, како што за МИА соопштија од Кабинетот на претседателот на Собранието. За нив ќе треба да расправа, според изјава на спикерот Талат Џафери, најмалку шест месеци. На ова треба да се додадат и ресурсите што Парламентот треба да ги потроши само за да се донесе еден закон. Дополнително, и уште поважно, е блокирањето на поголем дел од другите закони и активности планирани од мнозинството.
За архивирање, обработување и ставање во е-системот на Парламентот викендот беа ангажирани околу 120 вработени во собраниските служби. За да се разгледаат сите поднесени амандмани на Парламентот ќе му бидат потребни месеци.
Пред собраниската седница треба да се одржи и редовната понеделничка координативна средба на претседателот на Собранието Талат Џафери со координаторите на пратеничките групи од која се очекува да произлезе договор како ќе се одвива седницата имајќи го предвид бројот на поднесните амандмани, но и фактот што во Собранието првпат се применува ставот 3 од членот 173 на Деловникот и директно на пленарна седница ќе се гласа за амандмани произлезени од укажувања на претседателот на државата.
Неизвесно е дали претставници на опозициската ВМРО-ДПМНЕ ќе присуствуваат на координацијата со Џафери.
Влатко Ѓорчев, кој сега ја координира работата на пратениците од ВМРО-ДПМНЕ во петокот најави дека тие на седницата ќе настапуваат „како и досега“ односно со десет пратенички групи.
Ѓорчев, пак, нема да присуствува на седницата, бидејќи заедно со лидерот на партијата Кристијан Мицкоски е во Брисел на состаноци со официјални претставници на ЕК и европратеници.
Според Деловникот, поднесените амандмани ќе бидат разгледувани само на пленарна седница. Предлагачот ќе има три минути да ги образложи и амандманот ќе може да се гласа. За да биде донесен потребно е 61 глас. Координаторите на пратеничките групи имаат право и на процедурална забелешка од три минути. Доколку се слични амандманите можат да се групираат, објаснуваат од собраниските служби, но тие ќе мора да се гласаат поединечно.
Копии од амандманите во контејнер
По веста што викендов ја објави порталот Република.мк и дел од електронските медиуми дека дел од амандманите на ВМРО-ДПМНЕ за Законот за употреба на јазици биле најдени фрлени во контејнер до Собранието, законодавниот дом остро ги демантира овие наводи како обид за груба манипулација со јавноста и дискредитација на Службата на Собранието.
-По спроведена интерна проверка утврдено е дека сите оригинали од амандманите уредно се архивирани и се наоѓаат во собраниската архива. Амандманите прикажани во јавноста се копии од амандмани кои се уредно внесени во процедура и се веќе објавени на е-парламент, со што се достапни на сите 120 пратеници и на јавноста, се вели во соопштението од Собранието.
Првпат ќе се гласа за амандмани поднесени по забелешки од Претседателот
Во Собранието на Република Македонија првпат ќе се гласа за амандмани изготвени врз основа на забелешки поднесени од страната на претседателот на државата за закон чиј указ не го потпишал.
Ваквата постапка е предвидена со членот 173 од Деловникот за работа на Собранието, а овој член е вметнат со измените на овој акт од 2008 година. Претходно немало правна множност претседателот на вратен закон да достави забелешки, а пратениците да поднесат амандмани.
Пред 2008 година постапката за враќање на законите без потпишан указ била во согласност со Уставот на државата, а законите по враќањето во Собранието само биле ставани на гласање. Доколку законот бил изгласан повторно претседателот бил должен да го потпише указот. Закони во Собранието враќале и поранешните претседатели Бранко Црвенковски и Борис Трајковски.
Членот 173 од Деловникот предвидува претседателот на Собранието, веднаш по донесувањето, законот да го достави до претседателот заради потпишување на указот за прогласување на законот. Но, ако претседателот одлучи да не го потпише указот за прогласување на законот, Собранието повторно го разгледува законот во фаза на трето читање, во рок од 30 дена од денот на донесувањето на законот. По повторното разгледување на законот, амандмани можат да се поднесуваат само во врска со укажувањето на претседателот на Републиката.
Претседателот Ѓорге Иванов го врати законот за јазиците во Собранието без потпишан указ и со повеќе укажувања.
Извор:НоваТВ
По повеќе од шест часа заврши координацијата на државно-политичкиот врв .
Никој од учесниците не сакаше да изнесе детали за предлотот на Нимиц, за тоа дали е прифатлив и дали постои усогласенот меѓу политичките субјекти. Најавија уште вакви средби за координирање на ставовите за решавање на спорот со името.
[embedyt] https://www.youtube.com/watch?v=SZ2O6MwTsE8[/embedyt]
Премерот Зоран Заев по средбата изјави дека е оптимист и дека може да дојде до национален консензус.
– Вечерва беа презентирани и диксутирани предложените идеи од медијаторот Нимиц, по што разменивме информации и мислења и за разговорите меѓу мене и премиерот Ципрас. Овој процес бара инклузивност посветеност и политичка одговорност со цел градење национален консензус. Со решавањето на билатералниот спор кој трае 25 години имаме цел да обезбедиме напредок и интеграција на Македонија во ЕУ и НАТО, како и заштита на националните интереси и достоинството на нашиот народ, рече Заев.
Потенцираше дека за остварување на овие цели неопходна е вклученост на Владата, опозицијата, претседателот на државата, како и навремено и објективно информирање на граѓаните на Македонија.
– За тоа е потребна политчка волја и храброст од наша страна, но решение е можно доколку таква политичка волја постои и на грчката страна. Интеграцијата заедно со реформите и економските мерки се клучни за подобар живот на сите граѓани во РМ, додаде премиерот.
Состанокот се одржа на иницијатива на Министерството за надворешни работи.
На него присуствуваа Заев, министерот за надвортешни работи Никола Димитров, министерката за одбрана Радмила Шекеринска.
Присутни беа и претседателот Ѓорге Иванов, лидерот на ДУИ Али Ахмети кој беше во придружба на Хазби Лика и Бујар Османи, вицепремиер за европски прашања.
Лидерот на опозициската ВМРО-ДПМНЕ Христијан Мицкоски на состанокот беше во придружба на Александар Николовски и Владо Мисајловски.
Извор:НоваТВ
Здружението на новинарите на Македонија денес во Клубот на новинарите го претстави Извештајот за слободата на медиумите и безбедноста на новинарите во Македонија за 2017 година.
Претседателот на ЗНМ Насер Селмани рече дека минатата година во Македонија новинарите беа уценувани, прогонувани, тепани, добиваа смртни закани, се прогласуваа за предавници итн. „Насилниците физички и вербално ги напаѓаат новинарите затоа што сакаат да ги заплашат и замолкнат со цел јавноста да не дознае за злоупотребите на власта“, истакна тој.
Според извештајот, минатата година во Македонија вкупно се регистрирани 18 напади на новинари, од кои 13 физички и вербални напади, додека останатите се навреди, попречување во работа и уништување на имотот.
Исто така Селмани изрази загриженост што Обвинителството досега не покренало ниту едно обвинение пред судовите за насилство против новинарите и говор на омраза. „Неказнети останаа и познатите тројки на ВМРО-ДПМНЕ, кои спроведуваа кампањи на навредување и заплашување на новинари“, истакна Селмани.
Покрај недостигот на безбедност во работата, новинарите во Македонија работат под исклучително лоши економски услови. Тие имаат мали и нередовни плати, а немаат ниту договори за трајно вработување кое негативно влијае на нивната професионална независност.
Во извештајот е евидентирано дека ниту во медиумското законодавство нема подобрување, бидејќи тоа не е целосно усогласено со најдобрите европски практики.
Ова публикација е изработена во рамки на проектот „Регионалната Платформа на западен Балкан за застапување на слободата на медиумите и новинарската безбедност“. Содржината на оваа публикација е единствена одговорност на Здружението на новинарите на Македонија и на никаков начин не може да се смета дека ги одразува гледиштата на Европската Унија.
Здружението на новинари на Македонија е институционален грантист на програмата на ЦИВИКА Мобилитас.
Претседателот Ѓорге Иванов утрово се сретна генералниот секретар на НАТО Јенс Столтенберг со кого разговарал за евроатлантските интеграции на Република Македонија, за реформите во одбраната и безбедноста во согласност со НАТО стандардите, како и за унапредувањето и продлабочувањето на соработката со Северноатлантската алијанса, информираат од претседателскиот кабинет.
Иванов и Столтенберг оцениле дека односите и соработката меѓу Република Македонија и Алијансата се на високо ниво, и го истакнале придонесот што македонската армија го дава во рамки на меѓународните мировни мисии.
Иванов потенцирал дека Македонија во континуитет покажува дека е доверлив и стратешки партнер и сојузник на НАТО. Тој нагласил дека е неопходно Македонија да го добие одамна заслуженото членство во Алијансата, со што ќе се создадат трајни придобивки за безбедноста, стабилноста и просперитетот во целиот регион.
-Република Македонија со своите мировници континуирано ги споделува вредностите и обврските на Алијансата, оттаму, неопходно e час поскоро да ги споделуваме и поволностите што ги носи членството – изјави Иванов.
Иванов им порачал на земјите-членки на НАТО долгорочно да ги согледуваат новите реални предизвици со коишто се соочуваат регионот и Европа и да соодветствуваат со политиките на отворени врати и колективниот интерес на Алијансата.
Извор:Мета
Претседателот на Република Македонија, Ѓорге Иванов, попладнево објави дека не го потпишал Указот за Законот за јазиците, затоа што e, како што рече, неуставен.
-Имајќи ги предвид моите согледувања за неусогласеноста на Законот за употреба на јазиците со Уставот, но и изнесените укажувања на експертската и пошироката јавност за противуставноста на овој закон, а врз основа на член 75 од Уставот на Република Македонија, донесов одлука да не го потпишам указот за прогласување на Законот за употреба на јазиците. Денес упатив писмо до Собранието на Република Македонија со кое информирам дека не го потпишувам – рече Иванов.
Претседателот на Република Македонија вели дека овој закон е донесен неправилно – без јавна расправа, научна дебата и сосема неоправдано му било додадено европското знаменце.
– На 11 јануари 2018 година, Собранието на Република Македонија го изгласа Законот за употреба на јазиците, без јавна расправа, без научна дебата, без вклученост на академската и експертската јавност и без опозицијата. Во последното годишно обраќање потенцирав дека овој закон е донесен со европско знаменце, без притоа да постои европска директива што налага усогласување на македонското законодавство со законодавството на Унијата. Со овој закон, Република Македонија ќе стане можеби единствената европска држава која сама си поставува услови за членство во Унијата кои никој не ги бара. За апсурдот да биде поголем, дури и укажувањата на претставниците на Европската Унија не беа испочитувани и беа игнорирани – порача Иванов.
Според претседателот на државата, со законот се фаворизира албанскиот јазик и се воведува скап паралелизам во државната власт, што ќе донесе блокада и нефункционалност.
– Со овој закон се воведува многу скап паралелизам во сите органи на државната власт што води кон нивна целосна блокада и нефункционалност. Во услови на блокада постои опасност да се отвори прашањето за уставното редефинирање и загрозување на унитарноста, суверенитетот и територијалниот интегритет на Република Македонија. Наместо во духот на дијалогот и соживотот да градиме мултиетничко општество преку праведни и општоприфатени закони, ние донесуваме неправеден и репресивен закон со кој се фаворизира само албанскиот јазик – порача Иванов.
Извор:Мета
Указот за прогласување на Законот за употреба на јазиците, со кој се унапредува употребата на албанскиот јазик во државата и кој беше донесен од Собранието, според Уставот и парламентарниот Деловник треба да биде потпишан од првиот парламентарец Талат Џафери и претседателот Ѓорге Иванов.
Неизвесно е како ќе постапи Иванов и дали ќе го потпише указот за овој закон, што од Собранието му бил испратен уште вчера, веднаш по донесувањето. Иванов, како што посочуваат од неговиот Кабинет, има рок од седум дена да го потпише указот на законот.
Дилемата за тоа дали претседателот на државата ќе го потпише указот и дали законот ќе го врати со забелешки до Собранието, за што има право предвидено со Уставот и со Деловникот, беше отворена по неговото редовно годишно обраќање во Парламентот во кое кажа дека законот е неуставен и претставува закана по унитарноста на државата.
Претседателот Иванов може да одлучи да не го потпише указот за прогласување на законот. Во тој случај, според членот 75 од Уставот на Република Македонија, Собранието повторно го разгледува законот и доколку го усвои со мнозинство гласови од вкупниот број пратеници, претседателот е должен го потпише указот. Претседателот е должен да го потпише указот и доколку законот се донесува со двотретинско мнозинство гласови од вкупниот број пратеници.
Со Деловникот на Собранието, пак, се предвидува и ако претседателот одлучи да не го потпише указот за прогласување на законот, Собранието повторно да го разгледа законот во фаза на трето читање, во рок од 30 дена од денот на неговото донесување. По повторното разгледување на законот, амандмани можат да се поднесуваат само во врска со укажувањето на претседателот.
Во своето обраќање пред пратениците на 26 декември, Иванов кажа дека Законот за јазиците не преставува закана по македонскиот јазик, туку тој преставува закана по унитарноста на државата. Законот, според него, го крши Уставот на Република Македонија
Неговата одлука за законот, рече тогаш Иванов, се заснова врз дадените писмени гаранции за заштита на унитарноста, суверенитетот, територијалниот интегритет, независноста и мултиетничноста на Република Македонија. Тој, посочи Иванов, мора да биде во согласност со Уставот и усогласен со македонските закони.
– Јас сум претседател на сите граѓани и сакам унапредување на употребата на јазиците на сите заедници, вклучително и на албанскиот јазик, истакна Иванов.
Според него, барањето за двојазичност е апсолвирано со амандманот 5 од Уставот на Република Македонија, кој произлезе од Рамковниот договор, каде што се регулира прашањето за службениот јазик во Република Македонија.
Собранието на Република Македонија вчера со 69 гласа „за“ го донесе Законот за употреба на јазиците. Законот беше изгласан и со двојно мнозинство, односно за него гласаа 27 пратеници од немнозинските заедници, а еден беше воздржан. На седницата не присуствуваа пратениците од ВМРО-ДПМНЕ кои не учествуваат во работата на Парламентот во знак на револт од притворањето на петмина нивни колеги и други граѓани за учество во инцидентите во законодавниот дом на 27-ми април минатата година.
Кои се главните одредби на законот?
– Со законот се предвидува во сите органи на државната власт (централните институции, јавните претпријатија, агенции, дирекции, установи и организации, комисии и други институции), службен јазик покрај македонскиот јазик да биде и јазикот што го зборуваат 20 проценти од граѓаните на Македонија, а различен од македонскиот, односно тоа е албанскиот јазик.
Со тоа се овозможува комуникација и употреба на јазикот кој го зборуваат 20 проценти од граѓаните, а е различен од македонскиот, како службен пред сите органи кои што ја сочинуваат државната власт (Собрание, Претседателот на Република Македонија, Владата, судството, јавното обвинителство), Уставниот суд, Народниот правобранител, изборниот процес, образованието, науката, здравството, културата, полициските овластувања, радиодифузната дејност, нотаријатот, извршувањето, инфраструктурните објекти, матичната евиденција, личните документи, финансиите, економијата, како и во други области.
– Законот ја регулира и употребата на јазикот од страна на избраните или именуваните функционери ако се во институции чие седиште е во Скопје или општини во кои најмалку 20 проценти од граѓаните зборуваат јазик различен од македонскиот јазик. Тие во службената комуникација ќе можат да го употребуваат македонскиот јазик и албанскиот јазик во овој случај.
– Пратеник, избран или именуван функционер кој зборува јазик различен од македонскиот јазик, а кој го зборуваат најмалку 20 проценти од граѓаните (албанскиот јазик), на седница на Собранието и на седници на работните тела може да зборува и на албански.
– И седниците на Владата, на комисиите, како и на генералните колегиуми, доколку со нив претседава избран или именуван функционер кој зборува јазик различен од македонскиот јазик а кој јазик го зборуваат најмалку 20 проценти од граѓаните, ќе може да ги води на тој јазик и писмо.
– Стенограмите од седница на Собранието и од седници на работни тела, како и од другите материјали и документи се издаваат и се чуваат на македонски јазик и неговото писмо и на јазикот кој го зборуваат најмалку 20 проценти од граѓаните во Република Македонија и неговото писмо.
– Институциите се обврзани по службена должност да обезбедат употребата, комуникацијата и постапките да се одвиваат на јазикот кој го зборуваат најмалку 20 проценти од граѓаните во Република Македонија и неговото писмо доколку граѓанинот зборува јазик кој го зборуваат најмалку 20 проценти од граѓаните во Република Македонија.
– Веб страниците на институциите и содржината на веб страниците покрај на македонски, задолжително ќе се објавуваат и на јазикот кој го зборуваат најмалку 20 од граѓаните во Република Македонија.
– Називите на институциите како и сите други институции и нивните подрачни единици во единиците на локалната самоуправа во кои најмалку 20 проценти од граѓаните зборуваат службен јазик различен од македонскиот јазик и во Скопје, ќе бидат напишани на македонски јазик и на албански јазик. Ќе се пишува најгоре македонски јазик а под него и на албански.
– Книжните и кованите пари, како и поштенските марки, согласно законот, ќе содржат симболи што го претставуваат културното наследство на граѓаните што го зборуваат македонскиот јазик и на албанскиот јазик. Истото важи и за поштенските марки, уплатниците, фискалните извештаи издадени од институциите, фактурите, бандеролите.
– Судските, управните, извршните постапки, постапка за извршување на санкции, предистражните и истражните постапки, кривични и прекршочни постапки, парнични и вонпарнични постапки, како и другите постапки пред судовите, јавните обвинителства како и сите други органи, тела и институции, ќе се применуваат на македонски и албански јазик. Во постапките пред нотар, нотарските исправи и заверки ќе се издаваат на македонски јазик и на албански јазик.
– Униформите на полицијата, пожарникарството и здравството во Скопје и во општините каде живеат 20 проценти Албанци, исто така ќе бидат двојазични.
– Законските одредби предвидуваат за граѓаните кои зборуваат албански јазик образецот на личната карта да се печати и на јазикот и писмото што го употребува граѓанинот.
– На граѓаните кои зборуваат албански јазик на нивно лично барање, податоците за личното име што се внесуваат на личната карта и во пасошот се запишуваат на македонски јазик и неговото кирилско писмо и на јазикот и писмото што го употребува граѓанинот.
– Седниците на Државната изборна комисија и општинските изборни комисии во Скопје и единиците на локална самоуправа во кои најмалку 20 проценти од граѓаните зборуваат службен јазик различен од македонскиот јазик, при спроведување на изборите во работата и постапките на сите комисии и други тела и институции подеднакво се користат, употребуваат и применуваат македонскиот јазик и јазикот што го зборуваат најмалку 20 проценти од граѓаните и неговото писмо.
– Име на улица, плоштад, мост и на друг инфраструктурен објект во сите единици на локалната самоуправа каде што најмалку 20 проценти од граѓаните зборуваат јазик различен од македонскиот јазик, како и во Скопје се пишува на македонски јазик, како и на јазикот што го зборуваат најмалку 20 проценти од граѓаните.
– На граничните премини на Република Македонија и аеродромите кои се наоѓаат на подрачјата каде најмалку 20 проценти од граѓаните зборуваат јазик различен од македонскиот јазик ќе пишува на македонски јазик и на албански јазик.
Се предвидува и формирање Инспекторат за употреба на јазиците во состав на Министерството за правда, а предвидена е и казна во износ од 4.000 до 5.000 евра за органите како и сите други институции за непочитување на одредбите од овој закон.
Извор:НоваТВ