Репортажа

Камилите кои грижливо се одгледуваат на снежните ридови и висорамнини во областа Башкале во Ван, во летниот период се користат за борење, особено во активностите што се организираат во подрачјето на Егејското Море и Медитеранот.

Исхак Ербај живее во руралното место Коџакој, 30 километри оддалечено од центарот на областа Ван. Тој камилите ги купува од западните области во земјата и ги одгледува таму, навикнувајќи ги на тешките природни услови, и притоа, води особена грижа за нивната храна и нега.

Саит Арслан, одгледувачот на камили, работното време го започнува во раните утрински часови, кога животните ги храни со смеса од јачмен и слама.

Потоа ги води до потокот кој се наоѓа во близина на селото, за да ги напои, каде што истовремено ги чисти со помош на снегот.

Арслан преку целиот ден во снежните ридови и висорамнините ги чешла влакната на камилите. Неговата поврзаност со животните ги восхитува луѓето.

– „Секоја камила одделно ја повикувам по име“

Арслан за АА истакна дека одгледувањето на камилите е многу тешка работа.

Раскажувајќи дека животните ги храни двапати на ден, Арслан продолжи со зборовите: „Храната за камилите треба да се подготвува според одредени стандарди. Не јадат доколку има најмал недостаток во јачменот или сламата. Камилата е многу чисто животно. Во зима се чисти со снег, преку лето со чист песок. Ги одгледуваме многу добро, никогаш не ги занемаруваме.“

Нагласувајќи дека камилите за борење сакаат голема грижа, Арслан истакна:

„Местото каде што живеат камилите не треба да биде влажно. Тие непознатите лица не ги прифаќаат веднаш. Многу се поврзани со сопственикот. Камилите не личат на кравите, овците и другите животни. Камилата не треба да се тепа. Ако ја тепате, се лути, а ако се налути, тогаш ви плука во лице. Ги одгледувам како моите два сина. Од одгледувањето до исхраната, сѐ се прави на најдобар начин. Секогаш знам што сакаат. Ги контролирам на секој час. Секоја камила одделно ја повикувам по име.“

– „Туристите покажуваат интерес“

Сопственикот на камили, Ербај, одгледувањето го започна со 6 мали камили, а сега има околу 20. Во регионот ретко има луѓе што одгледуваат камили.

Раскажувајќи дека секоја година ги продава камилите што ги одгледува, особено во егејските и медитеранските подрачја, Ербај истакна:

„Ако успееш емотивно да се доближиш до камилата, многу е полесно да се грижиш за нив. Може да живеат и на места каде што температурата изнесува 40 степени под нулата. На почетокот луѓето се чудеа поради нашето одгледување камили, бидејќи биле информирани дека камилите живеат само во пустините на Арабија. Всушност, можат да живеат и тука. Во летниот период, интерес за камилите покажуваат домашните и странските туристи кои доаѓаат во регионот.“

Југоисточните градови на Турција, Дијарбакир и Мардин, кои биле домаќини на античките цивилизации, на своите посетители им нудат богато културно и историско искуство, јавува Anadolu Agency (AA).

Во Дијарбакир, кој поседува историски убавини, се протегаат спектакуларни камени ѕидини долги 4,82 километри, кои најверојатно за прв пат биле издигнати во 2000 пр. н. е. и се сместени на Листата на УНЕСКО за светски наследства.

Посетителите можат да уживаат во појадок со домородните деликатеси во мистичната атмосфера на „Diyarbakir House“ и „Suluklu Inn“, а потоа да тргнат да го истражуваат градот, почнувајќи од медресата „Месудије“, која е еден од првите универзитети во Анадолија, придружена од музеј-куќата на турскиот мислител Зија Ѓокалп, Литературниот музеј на Ахмет Ариф, медресата „Зинџирије“ и куќите на Џемил-паша, гувернерот на Дијарбакир во 16 век Искендер-паша, и на поетот Сулејман Назиф.

Џамијата „Улу“ во Дијарбакир за којa се претпоставува дека е изграденa во 938 година се наоѓа во подрачјето на Сур. Џамијата „Улу“ како и џамијата „Хазрат Сулејман“ се едни од атракциите во градот кои посетителите мора да ги посетат.

Црквата „Св. Ѓорѓи“ која е изградена на површина од 50.000 метри квадратни, датира од вториот век. Исто така вреди да се посетат и Артукидс Ин, како и подрачјето на Ичкале, каде што сјае архитектурата од периодот на Република Турција и од османслискиот период.

Историската куќа-музеј „Ататурк“, лоцирана на јужниот дел на градот е второто место кое паднува на ум кога некој ќе го спомене Дијарбекир. Пештерите „Бирклејн“, кои се наоѓаат во подрачјето Лиџе, каде што сè уште се видливи клинестите писма од Асирското Кралство, претставуваат историски чуда на Дијарбакир заедно со нивните сталактити и сталагмити.

Хиларските пештери и ридот Чајону, кои се едни од најстарите познати пештерски населби во Анадолија, покрај врз регионалната историја, фрлија светлина врз историјата на цивилизацијата.

Оние што ги истражуваат локалните кулинарски деликатеси во Дијарбакир можат да уживаат во јадењата како џигер-ќебап, „мефтуне“, „ичли ќофте“ (полнети ќофтиња) и сарма со месо или кисела зелка. Посетителите, исто така, можат да купат сувенири, како традиционални ракотворби и исклучиво дизајниран златен или сребрен накит.

– Мардин, градот на толеранција –

Градот Мардин со своите историски џамии, медреси, цркви, манастири и единствена архитектура, нуди незаборавен одмор за своите посетители.

Покрај својата историска текстура, Мардин се наоѓа меѓу најуникатните места за посетување во Турција, благодарение на хармонијата што владее во градот, која произлегува од позитивните врски помеѓу различните религии.

Гледањето на изгрејсонцето и зајдисонцето преку Мардинската тврдина во древниот град им овозможува на туристите уникатно и незаборавно искуство.

Вилите Ердоба или Џерџис Мурат, одбележани со уникатната камена архитектура на градот, се наоѓаат меѓу кулинарските дестинации кои треба да се посетат во Мардин. Некои од деликатесите што туристите можат да ги пробаат и да уживаат во нив се „сембусек“, „ичли ќофте“ (полнети ќофтиња), „кибе бумбар“, долма, чорба и ребра.

Освен тоа, посетителите на Мардин можат да се движат по шарениот и раздвижен пазар, каде што можат да купат егзотични зачини, слатки бадеми, филигран од сребро, рачно изработени предмети и локален органски сапун.

Манастирите „Дејрулзаферан“, „Мор Јакуп“ и црквата „Света Марија“ се наоѓаат меѓу некои од важните историски места за посета, особено за оние во културниот туризам. Манастирот „Мор Габриел“, кој се наоѓа на 23 километри од подрачјето Мидјат, е третиот најголем манастир на светот.

Урнатините на Дара, каде што се наоѓаат античките камени гробови што датираат од 5 век од н. е., се сметаат за „Ефес на Месопотамија“. Античкото место на Дара било едно од важните населби лоцирани на Патот на свилата.

Шефот на Здружението за туризам и хотели на Мардин, Озгур Азад Ѓунѓор, рече дека градот е подготвен да биде домаќин на локални и меѓународни туристи за среднорочен одмор, додавајќи дека Мардин секогаш уживал голем интерес кај туристите.

„Ние сме добро подготвени“, рече тој и додаде дека постои сериозна побарувачка, како и дека им претставува задоволство и очекуваат да ги угостат посетителите на Мардин.

Истанбул, колевка на цивилизацијата и некогашен дом на Римската, Византиската и Османлиската Империја, со векови продолжува да ги привлекува луѓето од сите сфери со својата колоритна историја, пишува Anadolu Agency (AA).

Со своите уникатни улици, историски храмови, Босфорот што поврзува два континенти, софистицираните острови и музеи кои ја расветлуваат светската историја, Истанбул чека на своите гости за да го сподели ова искуство.

Места кои задолжително мора да се посетат од страна на локалните жители и туристи се Аја Софија, Топкапи Сарајот, Џамијата „Султан Ахмед“ и Цистерната Базилика.

Покрај тоа, посетителите што сакаат да патуваат низ времето можат да ја истражат Сулејмановата џамија, уникатното дело на турскиот архитект Мимар Синан, Египетскиот пазар со своите автентични мириси, најстариот покриен пазар во светот „Капали чаршија“ и Археолошкиот музеј во Истанбул, кој е стар 127 години.

Мистичната атмосфера на Момината кула, тврдините со поглед кон Босфор, паркот „Ѓулхан“ со повеќе од 90 дрвја, познатата „Бања Хасеки Хурем Султан“ и малата улица „Согукчешме Сокаги“ полна со дрвени куќички со еркери, ги примамуваат оние лица кои бараат алтернативно патување во градот.

– Осмо светско чудо –

Аја Софија, која од страна на историчарите е наречена „Осмо светско чудо“, е еден од најпосетените музеи во светот во однос на историската уметност и архитектура, а своите посетители ги пречекува со сите свои убавини.

По нејзината реставрација за време на османлиската ера и минарињата што ги додаде Мимар Синан, Аја Софија стана еден од најважните споменици на светската архитектура.

Големата атракција Палатата Топкапи – административен, образовен и уметнички центар – се користела во Османлиската Империја речиси 400 години.

Историските приказни и богатата колекција на споменици и уметнички дела ја прават Топкапи Палатата една од најспектакуларните палати во светот.

Позната по своите шест минариња и својата боја, Џамијата „Султан Ахмед“ продолжува да биде во центарот на вниманието веќе четири века, благодарение на своите естетски елементи на турско-исламските компоненти што ги носи.

Местото изградено на вториот од седумте ридови во Истанбул е исто така важно во смисла на зачувување на сите убавини и суптилности на уметноста и естетиката од 17 век.

Цистерните изградени за задоволување на потребите со вода во византискиот период, во моментов му служат на туризмот во областа на културата и уметноста. Цистерните како Базилика, Нуруосманије, Бинбирдерек и Хиподром се дел од културното богатство на Истанбул.

– Пазар (Чаршија) кој мириса на цимет и каранфилче

Египетската чаршија или Египетскиот пазар, во кој се продаваат секаков вид билки и зачини, бил завршен во 1667 година, а привлекува внимание особено со својот мирис на цимет и каранфилче.

Египетскиот пазар е најважен дел од Патот на свилата (поим што се однесува на низа трговски и културни патишта) во Истанбул.

– Чаршија стара 5 века –

Капали чаршија се смета за еден од најважните и најстари трговски центри на Истанбул повеќе од 500 години, привлекувајќи ентузијасти од сите возрасти и инкорпорирајќи богата културна структура.

Археолошките музеи во Истанбул ги угостуваат оние што сакаат да патуваат низ коридорите на историјата и да ја видат еволуцијата на цивилизациите. Се сметаат за првите 10 музеи во светот дизајнирани како музејска зграда.

Истанбулските археолошки музеи се дом на некои од најважните дела на светот, како што се Александровиот саркофаг и Кадешкиот договор.