Автомобили

Криејќи од конкуренцијата точно кога, Mercedes некаде од идната година ќе започне да ги исфрла мануелните менувачи од своите возила за европскиот пазар. Не дека ги има многу – во моменталната понуда на компанијата тие се среќаваат само кај некои изведби на A, B и CLA класите. Причината не за ваквата одлука не се само трендовите и желбите на возачите, туку и сé помалку рентабилното нивно производство заради зголемениот број хибриди и плаг-ин хибриди кои имаат некаков вид автоматски или автоматизиран систем за трансмисија додека пак кај возила на електричен погон воопшто и немаат менувач. Mercedes веќе ги има исфрлено сите модели со мануелни менувачи од моделите за американскиот пазар.

„Turbo1“

Како и другите производители, „Mercedes“ се соочува со строги еколошки норми, поради што е принуден да вградува 4-цилиндрични агрегати во спортските верзии на своите лимузини. Последниот пример за ова е „Mercedes-AMG C43“, најевтината „AMG“ опција на „C-Class“.

Кога станува збор за дизајнот, во споредба со стандардната „C-Class“, автомобилот има нагласени спортски додатоци на каросеријата, различна решетка на ладилникот, нови алуминиумски тркала и четири издувни цевки кои извираат од задниот браник.

Сепак, најважното нешто во случајот со моделот „AMG“ е погонскиот систем. Станува збор за лонгитудинално поставен 2.0-литарски турбо бензинец со 408 ks и 500 Nm достапен при 5.000 вртежи во минута.

Менувачот е автоматски, 9-степен и забрзувањето до „стотка“ се реализира за 4,6 секунди. Максималната брзина е електронски ограничена на 250 km/h.

Моќта се пренесува на двете оски, во дистрибуција 31:69.

„Mercedes-AMG C43“ е опремен со електричен систем од 48 волти, што значи дека се работи за таканаречен „лесен“ хибрид и дека со помош на стартер-генератор може да се извлечат дополнителни 14 „коњи“ со помош на системот.

Оваа функција за „засилување“ помага кога на возачот му е потребна дополнителна енергија во краток временски интервал.

Покрај лимузината беше претставена и караванска варијанта, а двата модели во салоните ќе пристигнат кон крајот на годинава.

[embedyt] https://www.youtube.com/watch?v=lDvOjIYmIg4[/embedyt]

Denar

Новиот знаменосец на BMW носи нов дизајн, нови технологии, нова електрична верзија и многу, многу луксуз!

Баварците ја претставија новата, седма генерација на Серијата 7. Знаменосецот на BMW воведува многу новитети – а меѓу другото го добиваме и новиот електричен i7 кој може да помине повеќе од 600 километри со едно полнење на батериите.

Електричниот модел ја носи ознаката i7 xDrive 60, кој благодарение на големата батерија со капацитет од 101.7 kWh и моќните електромотори располага со вкупно 544 коњски сили и 740 Nm вртежен момент – доволно за големиот луксузен електричен седан да може да забрза до 100 километри на час за 4.7 секунди и да достигне максимални 240 километри на час, но и да помине до 625 километри со едно полнење на батериите (според WLTP мерењата).

За оние кои сакаат конвенционален модел, тука се 735i и 740i кои нудат 272, односно 380 коњски сили. Обете верзии можат да се добијат и со xDrive погон на сите четири тркала. Врв на бензинската понуда е 760i xDrive кој користи твин-турбо V8 и располага со 544 коњски сили. Во моментов нема дизелска понуда, а од BMW кажуваат дека барем на почетокот конвенционалните мотори нема да бидат достапни во Европа.

Новиот луксузен седан на BMW е поголем и покомфорен – новата Седумка е подолга за цели 126 милиметри. Дизајнот е агресивен, со големи отвори за воздух на предниот дел, како и „двоспратните“ предни светлосни елементи кои веќе ги видовме кај новиот X7. Профилот е чист и едноставен – дури и рачките од вратите се израмнети, додека на задниот дел доминираат тенките светла и агресивните црни аеро-елементи.

Доколку сакате поспортски лик, тука е M Sport пакетот со уште поагресивни браници и спортски детали. Доколку сакате врвен пакет, тука е M Sport Professional пакетот со Shadowline декорациски елементи.

Кабината нуди врвен луксуз – тука е закривениот дигитален панел (кој веќе го познаваме од големиот iX), а системот сега има целосно 5G поврзување за патниците да можат да уживаат во дигитални содржини. Вистинската трансформација е на задната клупа – на патниците им е достапен огромен 31-инчен екран (со 4К резолуција) кој BMW го нарекува Theater Screen.

Овој дисплеј е поставен на кровот и на патниците на задните седишта им овозможува врвно поврзување и дигитално искуство кое едноставно нема конкуренција. Кога ќе активираат Theater режим, големиот луксузен седан се трансформира во приватно кино – големиот екран се спушта пониско, завесите на прозорците се креваат, седиштата се навалуваат и осветлувањето во кабината се намалува, со цел да се понуди неприкосновено кино-искуство.

Секако, сите верзии добиваат воздушна адаптивна суспензија, а тука е Bowers & Wilkins аудио системот со 18 звучници, или пак Diamond Surround системот од истата компанија со дури 36 звучници. Патниците на задната клупа добиваат Touch Command дигитални прекинувачи во задните врати, и уште многу, многу повеќе..

Нарачките ќе бидат отворени наскоро, а првите примероци се очекуваат до крајот на годината.

CARclub

Футуристичкиот електричен автомобил на Audi со силуета на миниван, наречен Urbansphere, го забележа своето деби. Дизајниран за користење во мега-градовите на иднината, ставајќи приоритет на патниците и нивното искуство во возењето, Urbansphere требаше да дебитира на Салонот во Пекинг, но со оглед на тоа дека настанот беше одложен поради новиот бран на коронавирусот, истиот беше претставен преку дигиталните канали.

Прв електричен миниван на Audi

Иако во своето име го има називот „Urban“, ако се погледнат димензиите, концептот нуди нешто сосема спротивно од она што би се очекувало за урбано возило. Со своите 5,5 метри должина, 2 метри ширина и 1,78 метри висина, како и меѓуоскино растојание од 3,4 метри, Urbansphere е вистински џин. Овие пропорции прават концептот да изгледа како миниван со аеродинамична покривна линија, извајана каросерија, масивни 24-инчни тркала и големи дигитални простори на двата краја. Истите се дизајнирани за комуникација со околината преку пикселни LED светла кои креираат различни форми и бои.

Предниот дел привлекува особено внимание со новата интерпретација на дигиталната и целосно затворената Singleframe решетка која се протега кон страните, слично како кај Skysphere концептот.

Пространа кабина со премиум дизајн

Audi го опишува својот концепт како „уживање на тркала и мобилна канцеларија, служејќи како простор за живеење за во текот на времето поминато во сообраќај“, притоа нагласувајќи дека го има најголемиот простор во ентериерот во однос на сите свои модели, благодарение на својата форма и пакувањето на ЕВ платформата.

И покрај тоа што може да прими повеќе патници, Urbansphere има само четири независни седишта позиционирани во два реда кои можат да го понудат најдоброто можно искуство. Седиштата имаат Relax и Entertain режими со различни степени на навалување и поместување, екстензии за нозете и звучници на потпирачите за глава за приватни звучни зони.

Управувачот, дигиталниот инструмент кластер и педалите се сокриваат кога возилото е во автономен режим. Исто како и претходните „Sphere“ концепти, така и Urbansphere пристигнува со Ниво 4 способности на автономија кои ќе бидат претставени во продукциските возила во втората половина од деценијата.

Врвна технологија

Патниците имаат пристап до различни дигитални сервиси и инфозабавни карактеристики видливи преку проекцијата на контролната табла, екраните поставени на задниот дел од седиштата, очилата за виртуелна реалност, или транспарентниот OLED екран за задните патници. MMI бесконтактната респонзивност на вратите кои вклучуваат ротациски прстен и копчиња му овозможуваат на возачот да пристапи до голем број различни поставки, а исто така ќе може да се користат преку следење на видот, контрола со гестикулации и гласовна контрола кога седиштата се целосно навалени. Контролните панели за сите патници се интегрирани во потпирачите за раце, останувајќи скриени кога не се користат. Возилото исто така поддржува технологија за детектирање на стресот користејќи фацијални скенери и гласовни анализи и нуди предлози за релаксација.

За тапацирот, Audi искористи одржлива ткаенина бамбус, рециклиран полиамид наречен ECONYL и фурнир од габер без никакви хемии при производствениот процес. На крајот, концептот пристигнува со Audi Light Umbrella, светлечки чадор инспириран од кинеската традицина која може да го заштити корисникот од дождот и да користи како подвижен извор на светлина во темни простори.

Поставен на PPE платформата

Urbansphere е дизајнерска студија, но сепак е поставена на PPE платформата наменета за електрични возила развиена од страна на Audi и Porsche за продукциски модели. Концептот е опремен со два електромотори кои испорачуваат 401 КС и 690 Nm вртежен момент, иако само мал дел од овие бројки ќе бидат користени во градскиот сообраќај. Quattro системот за погон на сите четири тркала може да го деактивира задниот или предниот електромотор кога тоа е потребно за да се заштеди потрошувачката на енергија.

Батеријата која е поставена во подот има капацитет од 120 kWh, а Audi проценува дека опсегот на движење е околу 750 километри. 800 волтната технологија овозможува брзо-полначки карактеристики од 270 kW, овозможувајќи опсег на движење од 300 километри со само 10 минути полнење, додека полнењето од 5 до 80 проценти трае помалку од 25 минути. За оптимален комфорт, тука е адаптивниот воздушен систем на потпирање, заедно со управувањето на четири тркала.

Со Urbansphere концептот, Audi покажува дека размислува за нови сегменти на возила во електричната ера. Миниван моделите се исклучително популарни на кинескиот пазар, па оттаму не треба да се исклучи можноста за производство на возила со слични карактеристики. Sphere концептите се создадени како дизајнерски студии и нивната главна улога е да се прикаже дизајнерскиот јазик и технологијата кај идните модели на Audi.

Avtoplus