Црвените бејзбол капи што ги пародираат препознатливите капи MAGA на Доналд Трамп станаа симбол на данскиот и гренландскиот отпор против заканите на американскиот претседател да ја преземе замрзнатата територија.
Капите, на кои пишува „Направете ја Америка да си оди“ – пародија на слоганот на Трамп „Направете ја Америка повторно голема“ – добија широка популарност, заедно со неколку варијации, на социјалните медиуми и на јавните протести, вклучувајќи ја и демонстрацијата одржана за време на викендот во студено време во данската престолнина.
Европските влади застанаа зад Данска, нагласувајќи ја потребата од одбрана на арктичките региони и предупредувајќи дека заканите за Гренланд ја поткопуваат западната безбедност.
Сепак, демонстрантите беа значително помалку дипломатски.
„Сакам да покажам поддршка за Гренланд, а во исто време да покажам дека не го сакам претседателот на Соединетите Американски Држави“, рече Ларс Хермансен, 76-годишен жител на Копенхаген, кој носеше една од црвените капи на протестот во саботата.
Лажните капи беа дизајнирани од Јеспер Рабе Тонесен, сопственик на продавница за винтиџ облека во Копенхаген. Првата серија минатата година беше неуспешна – сè додека администрацијата на Трамп неодамна не ја засили својата реторика за Гренланд. Сега капите се појавуваат насекаде.
„Кога американската делегација отиде на Гренланд, почнавме да сфаќаме дека ова веројатно не е шега – не беше ријалити-шоу, туку беше вистинско“, рече 58-годишниот Тонесен.
„Потоа реков: Добро, што можам да направам? Може ли да пренесам сериозна порака на хумористичен начин и да ги обединам Данците за да покажам дека данскиот народ ги поддржува луѓето од Гренланд?“
Побарувачката одеднаш се зголеми – од спорадични продажби до распродажба на целата залиха за еден викенд. Тонесен рече дека сега нарачал „неколку илјади“ капи.
Оригиналната верзија на капата дизајнирана од Тонесен содржеше игра на зборови: „Nu det NUUK!“ – дериват од данската фраза „Nu det nok“, што значи „Доста е“, со зборот „nok“ заменет со Нук, малиот главен град на Гренланд.
Учесниците на протестот во саботата мавтаа со црвено-бели дански и гренландски знамиња и носеа рачно изработени транспаренти со кои се потсмеваа на американските претензии кон територијата.
„Не значи не“, пишуваше на еден транспарент. На друг пишуваше „Направете ја Америка повторно паметна“.
Носејќи една од пародичните капи, демонстрантот Кристијан Боје, 49, рече дека митингот пред Градското собрание во Копенхаген имал лежерен тон, но сериозна порака.
„Тука сум да ги поддржам Гренландците, кои минуваат низ многу тежок период во моментов“, рече тој. „Им се заканува инвазија на нивната земја. Сметам дека тоа е сосема неприфатливо“.
Извор:Вијести
