Голема група гневни израелски демонстранти во средата опколија фризерски салон во Тел Авив каде Сара Нетанјаху, сопругата на израелскиот премиер Бенјамин Нетанјаху, ја средувала својата коса.
Тие го блокирале влезот и извикувале антивладини пароли.
Во изминатите недели, во Израел се одржаа масовни протести против контроверзниот владин план за реконструкција на судскиот систем, во услови на растечки политички превирања.
Демонстрантите ја прогласија средата за „национален ден на немири“ и илјадници маршираа во различни градови, блокирајќи витални патишта и палејќи гуми на автопатите.
Кога Сара Нетанјаху беше забележана во салон во луксузен кварт во северниот дел на Тел Авив, толпа гневни демонстранти се собраа пред установата извикувајќи „земјата гори, а Сара се потстрижува“ и „срамота, срамота“, објавија израелските медиуми. .
Стотици полицајци беа повикани на местото на настанот, меѓу кои и неколку коњаници, и ја спроведоа Сара Нетанјаху надвор од салонот.
„Анархисти“
Екстремно десничарскиот министер за национална безбедност Итамар Бен-Гвир на Твитер напиша дека и наредил на полицијата „да и го спаси животот“ од демонстрантите кои го „опседнаа“ салонот.
Бенјамин Нетанјаху го осуди инцидентот како дополнителен доказ дека оние што демонстрираат против плановите за правда на владата се „анархисти кои се обидуваат да посеат неред“.
„Мора да заврши анархијата“, напиша Нетанјаху во објавата на Твитер покрај фотографијата на која се гушка со сопругата. „Тоа може да доведе до губење на животот.
Неколку лица беа повредени во средата, а најмалку 28 беа уапсени додека полицијата насилно ги растера протестите.
Нови протести се планирани за четврток во Тел Авив и Ерусалим.
(ТБТ)
