Според американскиот медиум „Вашингтон пост“, група претставници на Демократската партија претставиле предлог-закон за повлекување на американските сили и системи за противвоздушна одбрана од Саудиска Арабија и ОАЕ, како одговор на неодамнешната одлука на форматот ОПЕК + за намалување на производството на нафтата.
Овде потсетуваме дека оваа одлука на проширениот состав на нафтениот „картел“ ОПЕК (ги опфаќа најголемите земји производители на нафта кои не се во ОПЕК, пред се Русија, како и Саудиска Арабија, најголемиот светски извозник на нафта) доаѓа на крајно неповолен момент за Џо Бајден, во екот на предизборната кампања за Конгресот, во која на демократите не им оди најдобро ако им се верува на последните анкети. Имено, самото објавување на постигнатиот договор за намалување на производството на нафта за 2 милиони барели дневно доведе до раст на цената на нафтата, што, всушност, започна дури на почетокот на ноември.
Затоа Бајден беше крајно разочаран, дотолку повеќе што бројни американски државни службеници активно лобираа пред тоа, најмногу во Саудиска Арабија, ОАЕ и Кувајт, за да се спречи таквата одлука. Поради ова, тој ова го нарече „агресија врз американската економија и сиромашните земји во светот“ и најави одмазда, додека Стејт департментот тврдеше дека ОПЕК се усогласил со Русија.
Според споменатите американски медиуми, конгресмените Том Малиновски од Њу Џерси, Шон Кастен од Илиноис и Сузан Вајлд од Пенсилванија го претставиле предлогот за „Законот за тензично партнерство“ со кој ќе се бара повлекување на сите американски сили од Саудиска Арабија и ОАЕ, заедно со системи за противвоздушна одбрана како што се Patriot и Terminal High Altitude Area Defense System (THAAD) (насловна фотографија).
Потсетуваме дека овие системи беа префрлени на богатите арапски монархии по инцидентите со Иран, како и ракетните напади врз саудиските нафтени постројки на истокот од земјата пред неколку години, за кои никогаш не беше точно утврдено кој ги извршил (имаше различни верзии, од јеменските шиитски бунтовници Хути, преку проиранските сили во Ирак, до самиот Иран), иако Вашингтон се сомнева дека Иран стои зад нив.
„Наглото намалување на производството на нафта од Саудиска Арабија и ОАЕ, и покрај иницијативите на претседателот Бајден кон двете земји во последните месеци, е непријателски чин против Соединетите држави и јасен сигнал дека тие одлучија да застанат на страната на Русија во нејзината војна против Украина. “, велат, ни помалку, повеќе, во својата изјава демократските конгресмени.
geopolitikanews
