Заев

Премиерот Зоран Заев денеска пред Кривичниот суд изјави дека е разочаран што се случи уште едно бегство во името на поранешниот шеф на тајната полиција, Сашо Мијалков.

Тој додаде дека ќе побара детали за истрагата и случајот да биде расветлен во најбрз можен рок, затоа што народот очекува правда.

„Народот бара правда. Се случи уште едно бегство. Мијалков се очекува да биде осуден согласно предметот Таргет-Тврдина. Разочарани сме што тој се уште не е пронајден. Барам институциите да постапат согласно законот. Убеден сум дека тоа може да се спроведе. Очекувам детални информации и детали и истрага за самиот случај. Нашиот народ очекува расветлување оваа ситуација. Ќе побараме одговорност кога ќе ги знаеме деталите“, истакна Заев.

За сите протести, стоиме на располагање да разговараме за деталите, изјави денеска премиерот Зоран Заев, коментирајќи го најавениот попладневен протест на угостителите кои организираат свадби.

Во одговор на новинарско прашање, Заев истакна дека македонската економија живее и дека реализацијата на Буџетот е 99,5 проценти. Очекува напролет земјава да излезе од кризата и да се постигне очекуваниот раст на економијата.

– Во време на излез од кризата, лично имав став да завршиме со поддршка на платите. Да бараме излезно решение преку подигнување на профитабилноста, преку нови инвестиции, враќање на 10-15 илјади работници на работа. Како во цела Европа, така и ние, очекуваме напролет излез од кризата. И де факто излегуваме од кризата. Ги гледаме бројките и податоците. Верувам дека економиите во светот, па и нашата, не можат да опстојат долго со локдаун, бариери, тешка психологија која влијае врз сите. Мора да работиме сите, рече Заев, додавајќи дека во иднина ќе се генерираат мерки кои ќе поттикнуваат раст и развој.

Извор:НоваТВ

Вкупно 9,7 милијарди денари или 160 милиони евра тежи петтиот економски антикризен пакет. Содржи 29 мерки, распоредени во четири главни столба: директна финансиска поддршка за компаниите во туризмот, занаетчиството, угостителството, транспортот, индустријата за организација на настани со цел задржување на работните места, финансиска поддршка за ликвидноста на приватниот сектор со бескаматни кредити со неповратна компонента, креирање поповолно деловно опкружување со системско редефинирање на Царинскиот тарифник, намалување на парафискалните давачки, даночно олеснување и одложување кај неколку јавни давачки, како и директна помош за граѓаните, соопшти денеска премиерот Зоран Заев.

Заев на прес-конференција во Владата истакна дека 91,7 милиони евра од вредноста на пакетот се директни буџетски трошења.

-На денешната владина седница е затворен пакетот за стабилна и развојна македонска економија и за подобрување на ликвидноста на стопанството. Овој пакет директно се надоврзува на претходните четири и има за цел да ја придвижи економијата кон нам познатите стапки на раст од 4 – 5 проценти, односно на динамиката на раст што ја имавме пред пандемијата, рече Заев.

Поддршката од повеќето мерки, рече, ќе се користи до крајот на 2021 година за да имаат влијание и ефект врз економијата. Мерките се донесени низ дијалог и партнерство со сите  релевантни чинители – стопанските комори, работодавачите и синдикатите, како и изминатите четири пакети, проследени со сериозни анализи од институциите.

– Мерките ќе го заокружат процесот на директна поддршка со што преминуваме во фаза на излез и закрепнување од кризата. Тоа значи дека доаѓаме повторно во време на стабилност и развој, состојба која со овие мерки дополнително очекуваме да се стимулира. Со кредити со ниски камати и преку системски мерки согласно планот за раст на среден и долг рок, ќе биде поддржана економијата во целина. Очекуваме посериозни стапки на раст на БДП во вториот квартал на 2021 година, истакна премиерот.

На прес-конференцијата во Владата присуствуваат заменик-претседателот на Владата задолжен за економски прашања Фатмир Битиќи, министерот за финансии Фатмир Бесими и министерот за економија Крешник Бектеши.

извор:НоваТВ.мк