Министерството за здравство извести дека вчера од страна на Државниот санитарен и здравствен инспекторат е извршен вонреден инспекциски надзор во ПЗУ Свети Лазар (Моја Болница-Санте плус), во однос на почитување на законската регулатива.
-При надзорот се констатирани недостатоци, заради што од страна на ДСЗИ, записнички и со решение е дадена забрана за работа се до отстранување на констатираните недостатоци, соопшти Министерството за здравство.
Во соопштението од таму не се појаснува за што точно се работи и какви се констатираните недостатоци.
Д-р Ирина Сотирова Бухова, директор на Државниот санитарен и здравствен инспекторат, вели дека засега детали околу недостатоците утврдени при надзорот нема да даваат, бидејќи дел од увидот сè уште не е завршен, а во тек е и работата на мисијата формирана од Министерството за здравство, која треба да утврди од зошто дошло до смртен исход на родилката.
„Кога ќе ги имаме комплетно податоците ќе излеземе со повеќе детали“, вели д-р Сотирова Бухова.
Дебора Џамбази
Приватната болница Санте плус е во фокусот на јавноста откако минатата недела почина родилката Дебора Џамбази која се породувала таму во четвртокот со царски рез.
Од болницата ја транспортирале родилката на државните клиники, и од таму тврдат дека таа била однесена жива во КАРИЛ, но од КАРИЛ се децидни дека таму е однесена почината.
Нејзиното бебе се наоѓа на Клиниката за детски болести од каде потврдија дека бебето е во тешка но, стабилна состојба.
-Бебето е стабилно, но уште е во критична состојбата. Се уште е на апарати за дишење, денеска ќе се направи уште една контрола така што се надеваме дека ќе успее да се извлече иако е донесено со крвавење на мозокот, изјави завчера Катерина Ставриќ директорка на Клиниката за детски болести.
Министерството за здравство формираше комисија која го истражува случајот со смртта на младата родилка.
Анестезиолог од КАРИЛ учествувал во породувањето на починатата родилка
Анестезиолог од КАРИЛ учествувал во породувањето на починатата родилка
Извор:НоваТВ