Рочиште

Презентирајќи го Обвинението за десетмината обвинети за обидот за убиство на Зијадин Села при упадот во Собранието на 27 април, јавниот обвинител Дарко Јакимовски, рече дека единствената причина поради која Села не е убиен е тоа што сите мислеле дека е мртов.

-Доказите ќе покажат дека во моментите кога нападот и тепањето го достигнале екстремот единствена околност за спас на оштетениот Зијадин Села не е колебањето на тепачите, туку фактот дека не давал знаци на живот и сите мислеле дека е мртов. Сите повреди на оштетениот му се нанесени на главата и најмалку две се животно загрозувачки, рече Јакимовски.

Тој истакна дека како докази за кривичното дело има фотографии, видео снимки и искази на сведоци.

Адвокатите на обвинетите, пак, во нивно име се изјаснија дека тие не се виновни. Според дел од адвокатите, тие не нанеле повреди кои се животно загрозувачки, а за дел од обвинетите, како Коста Делов, рекоа дека воопшто не учествувале во нападот на Села, туку само „сакал да се пофали на Фејсбук дека на 27 април бил во Собранието“ и дека врз основа на тоа е покрената истрага.

Адвокатот на обвинетиот Александар Јаневски кажа дека неговиот клиент бил тој кој го заштитувал и му помагал на Села.

Наредното рочиште за нападот врз Зијадин Села е закажано за 8 февруари. Тогаш како сведоци се повикани Села, вештаци од Институтот за судска медицина и двајца сведоци кои биле присутни во Собранието на 27 април.

Села не беше присутен на денешното судење, а во судницата присутни беа десетмината обвинети. Во овој случај обвинети се Кире и Цане Ѓорѓиевски, Оливер Ошавковски, Саша Ценков, Николче Димитриевски, Александар Јаневски – Тошта, Андреј Мицов, Никола Војминовски, Коста Делов и Стојан Павловски – Кобра.

Претседателот на Собранието Талат Џафери утрово го известил судот дека поради работни обврски е спречен да дојде во својство на сведок на судењето.

Судскиот процес го води судијата Славица Андреевска.

За настаните во Собранието веќе се изречени судски пресуди за два предмета. Во првиот, девет лица учесници во насилства добија условни казни, а во вториот случај Панче Ангелов, напаѓачот на Радмила Шекеринска доби казна затвор од четири години.

Во тек е истражна постапка и за предметот што го отвори Јавното обвинителство за „терористичко загрозување на уставниот поредок“ за што се осомничени 36 лица. 

 Извор:НоваТВ