Во присуство на највискиот државен врв и претставници на верските заедници, генералниот секретар на НАТО, Јенс Столтенберг, од собраниската говорница ја пофали Македонија за напредокот и реформите за кои рече дека ја отвораат можноста за полноправно членство во Алијансата.
[embedyt] https://www.youtube.com/watch?v=tU0yiVICOXU[/embedyt]
Како што нагласи Столтенберг, настаните од 27.април биле шок за него и за земјите членки на НАТО, но исто така бил импресиониран од напредокот постигнат од 27.април наваму.
„Настаните во април во оваа сала ме шокираа и мене и членките на НАТО, но импресионирани сме од напредокот последните девет месеци, од создавањето на нова, инклузивна политичка култура“, рече генералниот секретар на НАТО.
Тој ја поздрави и транспарентноста, судските реформи и Планот 3-6-9 на Владата, но рече дека истото мора да продолжи. Воедно ги поздрави усвојувањето на Законот за употреба на јазиците и Договорот за добрососедство со Бугарија, а ја пофали Владата и за подобрените односи со соседите.
Столтенберг ја потенцираше и улогата на опозицијата како „многу важна“ која треба да ја следи и да ја коригира Владата, а за граѓанското општество рече дека треба да продолжат да даваат помош во реформите.
„Алијансата сака да ве види на масата. Преминувањето на прагот бара сериозна работа. Бидете транспарентни со нас за реформите, ние ве поддржуваме и ќе помогнеме колку што можеме. Вратите на НАТО се отворени. Претворивте држава на реална можност од една нестабилна држава, за нова просперитетна држава. Вие ја иате и визијата и алатките“, рече Столтенберг во Собранието.
Посочувајќи го примерот со членството на Црна Гора во НАТО, Столтенберг рече дека има простор за уште знамиња пред седиштето на Алијансата, алудирајќи дека Македонија има реална шанса да стане полноправна членка.
Во своето обраќање тој потенцираше и дека земјите членки го препознаваат новиот ентузијазам и сакаат Македонија да успее.
Ја поздрави волјата на Владата за решавањето на спорот со името, но рече дека освен тоа, потребно е да се продолжи со работа, бидејќи Алијансата како што рече тој, споделува исти вредности и принципи.
Протест пред Собранието
Група граѓани, меѓу кои и пратеничката Солза Грчева и членови и приврзаници на политичката партија „Левица“ денеска протестираат пред Собранието, за време на обраќањетона Столтенберг.
Демонстрантите имаат истакнато транспаренти на кои пишува „Против војна за профити“, „Во НАТО ниту под уставно име“…
Претходно, пратеничката Солза Грчева преку Фејсбук повика на протест за, како што пишува „да кажеме дека имаме едно име – Република Македонија“.
Мирниот протест го обезбедуваат полицајци.
Извор:НоваТВ