Шпанските пратеници во среда одобрија закон за зајакнување на ембаргото за оружје врз Израел, што премиерот Педро Санчез го воведе за да се стави крај на она што тој го нарекува геноцид во Газа.
Парламентот гласаше со 178 гласови „за“ и 169 „против“ за декретот објавен во септември од Санчез, еден од најгласните критичари меѓу светските лидери на разорната двегодишна војна на Израел на палестинските територии.
Поддршката на крајно левичарската партија Подемос, која има четири места и го критикуваше декретот, помогна да се префрли гласањето во корист на малцинската левичарска коалиција по денови шпекулации за ставот на нејзините пратеници.
Владата вели дека веќе забранила купување оружје од или за Израел од почетокот на војната на 7 октомври 2023 година.
Сепак, Санчез минатиот месец објави декрет за „зајакнување“ на ембаргото како дел од низа мерки против израелската офанзива.
– Израелскиот одговор на ужасните напади извршени од терористичката група Хамас на 7 октомври 2023 година се претвори во неселективен напад врз палестинското население што повеќето експерти го нарекоа геноцид – се наведува во преамбулата на законот
Се забранува целиот извоз на воена опрема, производи или технологија во Израел и увоз на таква стока од земјата.
Регулативата, исто така, забранува транзит на авионско гориво со потенцијална воена употреба и забранува рекламирање на производи „кои доаѓаат од нелегални колонии во Газа и Западниот Брег“.
Текстот ѝ дозволува на владата да прави исклучоци за воена опрема со двојна употреба „доколку спроведувањето на забраната им штети на општите национални интереси“.
Септемвриското соопштение предизвика жестока осуда од Израел, кој веќе го повлече својот амбасадор од Мадрид во 2024 година откако Шпанија ја призна палестинската држава.
