Камиони со хуманитарна помош влегоа денес во Газа од Египет преку граничниот премин Рафах под надзор на персоналот на египетската Црвена полумесечина, додека операциите за помош продолжуваат во услови на тековните ограничувања и итни хуманитарни потреби во Појасот Газа.
Во исто време, во израелските воени напади загинаа 30 цивили, вклучувајќи деца, во Појасот Газа.
Медицински извор за агенцијата Анадолија изјави дека пет члена на едно семејство биле убиени во израелски напад насочен кон шатор во кој биле сместени раселени Палестинци во бегалскиот камп Шати во западниот дел од градот Газа.
Четири лица, меѓу кои и деца, беа убиени во друг напад врз шатор во близина на Исламскиот универзитет во Газа во истиот град.
Израелската армија гранатираше куќа во јужната населба Сабра, при што загинаа две деца, а други беа повредени.
Уште четири Палестинци од истото семејство ги загубија животите, а други беа повредени откако израелската армија погоди зграда во која беа сместени раселени лица во населбата Зејтун, во југоисточниот дел од градот Газа. Нападот предизвика и пожар во зградата.
Во централниот дел од Појасот Газа, осум Палестинци беа убиени од израелски оган во близина на место за дистрибуција на помош во северниот бегалски камп Нусејрат, според соопштението од болницата Ал-Авда.
Уште пет лица, меѓу кои и едно дете, беа убиени, а други беа повредени кога израелски воени авиони гаѓаа неколку куќи во бегалскиот камп.
Палестинска жена и нејзините две деца беа убиени во израелски напад врз нивната куќа во бегалскиот камп во Кан Јунис.
Израелските авиони гаѓаа шатор во Ал-Маваси, Кан Јунис, при што беа повредени 12 лица.
Израел уби повеќе од 62.000 Палестинци во Газа од октомври 2023 година. Воената кампања ја опустоши енклавата, која се соочува со глад.
Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со обвинение за геноцид пред Меѓународниот суд на правдата поради војната во енклавата.
