Акциите на Израел во Појасот Газа не се во согласност со принципите на блиска соработка со Европската унија, се наведува во внатрешен извештај на ЕУ, според дипломати, дознава агенцијата dpa.
Шефовите на дипломатиите на земјите од Европската унија во мај решија да направат анализа дали Израел се придржува до основните принципи на Договорот за асоцијација со ЕУ.
Меѓу овие принципи е дека односот меѓу потписниците на договорот се заснова на почитување на човековите права.
Во извештајот, кој е подготвен под раководство на шефицата за надворешна политика на Европската унија, Каја Калас, се заклучува дека акциите на Израел во Појасот Газа го нарушуваат овој фундаментален принцип, пренесува Хина.
Заклучоците во голема мера се однесуваат на израелската блокада на хуманитарната помош за Појасот Газа.
Израел речиси три месеци го блокираше влезот на помош во опустошената крајбрежна енклава, под изговор дека ја користи Хамас. Од мај, блокадата е ублажена, а помошта се пренасочува преку контроверзната Хуманитарна фондација за Газа.
Земјите-членки на Европската унија сега се соочени со прашањето како да одговорат на извештајот.
Нивните мислења се движат од суспендирање на договорот со Израел до воведување економски санкции.
Холандија е една од неколкуте земји кои тврдат дека Израел го прекршил основниот принцип за почитување на човековите права во своите постапки во Газа.
Интензивни дискусии за договор за партнерство со Израел веќе се одржаа минатата година на иницијатива на Шпанија и Ирска.
(Vijesti.ba)
