Сириското Министерство за внатрешни работи донесе историска одлука, со која ги укина сите забрани за патување што на граѓаните им ги издаде поранешниот режим на Башар ал Асад.
Оваа мерка опфаќа дури 5,16 милиони случаи, вклучувајќи налози за апсење, покани, известувања и забрани поврзани со избегнување на задолжителна и резервна воена служба.
Во соопштението на Министерството се нагласува дека укинувањето на овие ограничувања претставува важен чекор кон нормализирање на животот на граѓаните, кои беа погодени од репресивните мерки на претходниот режим.
По падот на режимот на Башар ал Асад, Сирија претрпе значителни политички промени. Асад, сирискиот лидер кој владееше со земјата речиси 25 години, ја напушти Сирија на 8 декември, барајќи азил во Русија. Овој момент го означи крајот на владеењето на партијата Баас, која беше на власт од 1963 година.
Во јануари оваа година, Ахмед ал Шара, водачот на антирежимските сили, беше прогласен за привремен претседател, отворајќи ново поглавје во историјата на Сирија.
