Израел во неделата објави дека ќе ја затвори својата амбасада во Даблин поради „еклатантно антиизраелската политика на ирската влада“, вклучително и признавањето на палестинската држава и поддршката за меѓународна правна акција против израелската војна во Појасот Газа. Ова го објави британски Ројтерс.
Израел веќе го отповика својот амбасадор по одлуката на Ирска да го одобри создавањето на палестинска држава во мај, но неговата влада беше дополнително налутена минатата недела кога Даблин го поддржа случајот на Јужна Африка пред Меѓународниот суд на правдата поради наводите за геноцид врз Израелците.
„Одлуката за затворање на израелската амбасада во Даблин е донесена во светло на радикалната антиизраелска политика на ирската влада“, се наведува во соопштението на израелското Министерство за надворешни работи.
„Акциите и антисемитската реторика што ги користи Ирска против Израел се вкоренети во делегитимизирањето и демонизирањето на еврејската држава, како и двојните стандарди. Ирска ги премина сите црвени линии во односите со Израел. – изјави израелскиот министер за надворешни работи Гидеон Саар.
Во својот одговор до Израел, ирскиот премиер Сајмон Харис изјавил дека оваа одлука е длабока навреда и дека неговата земја секогаш ќе се залага за правата на луѓето и меѓународното право.
„Целосно го отфрлам тврдењето дека Ирска е против Израел. Ирска се залага за мир, човекови права и меѓународно право“. – рече ирскиот премиер и додаде дека „Ирска сака решение со две држави и Израел и Палестина да живеат во мир и безбедност“.
Ирскиот министер за надворешни работи Мајкл Мартин изјави дека двете земји ќе одржуваат дипломатски односи и дека не се планира затворање на ирската амбасада во Израел.
