Планот за изградба на гасовод што го поврзува Катар со Европа преку Турција, кој со години беше во мирување, би можел да биде рестартиран по падот на сирискиот претседател Башар ал Асад, изјави во понеделник турскиот министер за енергија и природни ресурси Алпарслан Бајрактар.
Говорејќи по состанокот на владата во Анкара, Бајрактар истакна дека проектот може да биде остварлив под услов Сирија да обезбеди територијален интегритет и политичка стабилност. „Ако Сирија постигне стабилност, тој гасовод би морал да биде безбеден. Се надеваме дека ќе дојде до таква ситуација“, рече Бајрактар, додавајќи дека спроведувањето на вакви енергетски проекти може да помогне во обновата на Сирија разурната од војна.
Бајрактар истакна дека енергијата е клучен фактор за закрепнување на Сирија. „Без инфраструктура нема развој. Мора да најдеме начин енергијата да ја претвориме во алатка за задоволување на основните потреби“, објасни тој.
Нова динамика
Планираниот гасовод ќе го поврзе Катар богат со природен гас со европските пазари, поминувајќи низ Саудиска Арабија, Јордан и Сирија пред да стигне до Турција. Овој проект, покрај значајните економски придобивки, има и геополитички импликации, бидејќи би ја намалил европската зависност од рускиот гас.
Башар ал Асад, кој владееше со Сирија речиси 25 години, побегна во Русија откако антирежимските сили ја презедоа контролата врз Дамаск. Колапсот на режимот на партијата Баас, кој беше на власт од 1963 година, отвори нова политичка и економска динамика во регионот.
