Министерот за одбрана на Израел, Израел Кац изјави дека Израел, кој продолжува со нападите во Либан, нема да склучи примирје со Хезболах „се додека не ги постигне своите цели“.
За време на состанокот со израелските воени претставници, Кац ги коментираше судирите со Хезболах, нападите во Газа и зголемувањето на тензиите со Иран.
Тој посочи дека „нуклеарните капацитети на Иран се поранливи од кога било по израелските напади врз нивните објекти за противвоздушна одбрана“, со што навестува воен напад врз иранските нуклеарни постројки.
Кац рече дека најважната цел на нападот, кој предизвика големи разурнувања во Газа, е враќањето на израелските заложници.
Што се однесува до нападот во Либан, Кац рече дека „нема да има примирје со Хезболах додека не се постигнат целите на војната“.
Израелскиот министер за надворешни работи Гидеон Сар претходно изјави дека е постигнат „извесен напредок“ во постигнувањето примирје со Хезболах во Либан.
Како што објавија израелските медиуми, израелскиот министер за стратешки прашања Рон Дермер, кој е многу близок со премиерот Бенјамин Нетанјаху, отпатува за Соединетите Американски Држави (САД) за да разговара за прекин на огнот со Хезболах во Либан.
Весникот „Једиот Ахронот“, повикувајќи се на неименувани американски претставници, наведува дека новоизбраниот американски претседател Доналд Трамп испратил порака до сегашната администрација на Џо Бајден во врска со прекинот на огнот меѓу Израел и Хезболах.
Израел започна голема воздушна кампања во Либан против, како што тврди, цели на Хезболах по едногодишната прекугранична војна меѓу Израел и либанската група Хезболах што избувна по бруталната израелска офанзива на Појасот Газа.
Израел го прошири конфликтот на 1 октомври оваа година со копнениот напад врз јужен Либан.
Речиси 3.200 луѓе се убиени, а повеќе од 13.800 се повредени во израелските напади од октомври минатата година, според либанските здравствени власти.
(Vijesti.ba)
