Турција одбива НАТО да „учествува“ во војната во Украина, изјави денеска турскиот министер за надворешни работи Хакан Фидан по неформалниот состанок на шефовите на дипломатиите на Алијансата во Прага.
„Го поддржуваме продолжувањето на помошта за Украина и капацитетот на Украина да обезбеди одвраќање, но не сакаме НАТО да учествува во таа војна“, изјави турскиот министер за надворешни работи, пренесе Бета.
За Турција едно е да се поддржи Украина да го гарантира нејзиниот територијален интегритет и да ја ослободи територијата, но друго е да го вклучи НАТО во војната. Според министерот Фидан, тоа ризикува да доведе до регионално проширување на конфликти и поголеми кризи.
Турција успеа да ги одржи врските и со Русија и со Украина од почетокот на конфликтот во февруари 2022 година.
Турција го изрази овој став во време кога неколку земји од НАТО, вклучително и САД, ја овластија Украина да го користи оружјето што и го дадоа за да ја нападне Русија доколку се брани од напади. Американскиот претседател Џо Бајден и даде зелено светло на Украина да гаѓа цели на руска територија, во регионот Харков, под одредени услови.
(Vijesti.ba)
