„Поддршката на Обединетото Кралство за Израел зависи од усогласеноста на Израел со меѓународното хуманитарно право“, напиша британскиот министер за надворешни работи Дејвид Камерон во колумна објавена денеска, неколку дена по израелскиот воздушен напад во кој загинаа седум хуманитарни работници, меѓу кои и тројца Британци.
„Нашата поддршка не е безусловна“, напиша Камерон во „Сандеј тајмс“. „Очекуваме ваквата горда и успешна демократија да се придржува до меѓународното хуманитарно право, дури и кога е оспорена“, додаде тој.
Британската влада е верен сојузник на Израел од нападот на Хамас на 7 октомври во јужен Израел, кој ја поттикна израелската војна за елиминирање на милитантната исламистичка група, но Камерон го заостри својот став во последните месеци во врска со страшната хуманитарна ситуација во палестинската енклава.
Камерон предупреди на ризик од масовно гладување доколку Израел не дозволи поголема помош. Во саботата, ОК објави дека ќе испрати поморски брод за да испорача помош како дел од меѓународните напори.
Британскиот премиер Риши Сунак во неделата, по повод шест месеци од нападот на Хамас врз Израел, го повтори повикот до Хамас да ги ослободи израелските заложници и веднаш да ги прекине борбите.
„Ние продолжуваме да стоиме зад правото на Израел да ја победи заканата од терористите на Хамас, но целото Обединето Кралство е шокирано од крвопролевањето и ужасната од убиството на храбрите британски херои кои носеа храна на сиромашните“, рече Сунак.
(Vijesti.ba)
