Ирска се подготвува да се приклучи на тужбата за геноцид што Јужна Африка ја покрена против Израел пред Меѓународниот суд на правдата (МСП).
Според ирските медиуми, вицепремиерот и министер за надворешни работи и одбрана, Мајкл Мартин, на новинарите им рекол дека Ирска сака да го поддржи обвинението за геноцид против Израел.
Тој истакна дека неговиот правен тим го информирал за деталите од тужбата минатата недела.
– Сметаме дека имаме основа да интервенираме во тужбата – изјави Мартин.
Тој нагласи дека ситуацијата во Појасот Газа е вистинска хуманитарна катастрофа, додавајќи дека испораката на помош за палестинската енклава очигледно е блокирана.
Мартин предупреди дека тоа води кон уништување на жителите на Газа.
По првата правна анализа, Мартин побара од ирските власти да подготват нацрт-декларација дека ќе интервенираат во тужбата.
Заменик-премиерот на Ирска потоа ќе го достави нацртот до Владата на разгледување. Доколку нацртот биде одобрен, ќе се направат аранжмани за негово доставување до МСП во Хаг.
На 26 јануари, по тужбата за геноцид поднесена од Јужноафриканската Република, Меѓународниот суд на правдата одлучи дека Израел мора да се воздржи од какви било дејствија поврзани со убиства, напади и уништување на жителите на Појасот Газа и да ги преземе сите мерки за да спречи геноцид.
