Голем дел или 170 километри од безбедносниот ѕид во источна Турција долж границата со Иран е делумно завршен со цел да се спречат илегални преминувања, шверц и инфилтрација на терористи, пишува турската агенција АА.
Во тек е изградба на целиот безбедносен ѕид и набљудувачки кули во источната провинција Ван, како и копање ровови со цел да се обезбеди безбедност на целата 295 километри граница со Иран и да се спречат нелегални активности. Екипите што го градат безбедносниот ѕид, особено за да се спречи илегалната миграција на поединци од Иран во Турција, досега имаат изградено 170 километри.
Специјални тимови од главниот град Анкара најпрво ги расчистуваат мините долж границата за да го направат ѕидот побезбеден и да помогнат во затворањето на тунелите. Бетонските блокови потоа се поставуваат на граничната површина, која е однапред подготвена со тешка механизација. Безбедносните мерки се силни со цел да се спречи илегално преминување на нерегуларни мигранти, да се сузбие шверцот и да се спречи инфилтрација на терористи. Безбедносните сили користат цела низа домашна технологија за надзор развиена од турскиот одбранбен гигант Аселсан.
Дроновите се користат и за извидување и надзор. Безбедносните сили, водени од принципот дека „границата е светиња“, интервенираат за да се спречат сите нелегални инциденти долж границата. Патролирајќи дење и ноќе, дежурните безбедносни сили ги спречуваат нерегуларните мигранти кои се обидуваат да ја преминат границата.
