Ричард Пиперкорн, претставник на Светската здравствена организација (СЗО) за окупираните палестински територии, изјави дека на секои десет минути се убива дете во Појасот Газа.
– Во оваа смисла мислам дека сме блиску до најтемниот момент на човештвото. Ни треба траен прекин на огнот за Газа – рече Пиперкорн.
На неделната прес-конференција на Канцеларијата на Обединетите нации (ОН) во Женева, тој даде своја оценка за ситуацијата во Газа, која е под израелска блокада и интензивни напади.
Тој потсети дека од 7 октомври досега во Газа се убиени околу 16.000 луѓе.
– Повеќе од 60 отсто од убиените се жени и деца. Повеќе од 42.000 луѓе беа повредени. Во Газа во просек на секои десет минути се убива по едно дете – изјави Пиперкорн.
Израел ја продолжи својата воена офанзива врз Појасот Газа во петокот, откако стави крај на еднонеделното хуманитарно примирје со Хамас.
Најмалку 15.899 Палестинци се убиени, а повеќе од 42.000 се повредени во немилосрдните воздушни и копнени напади врз енклавата од 7 октомври.
