Русија потпиша договори за воена соработка со повеќе од 40 африкански земји, објави во петокот во Санкт Петербург рускиот претседател Владимир Путин, пренесува Ројтерс.
„Со цел да ги зајакнеме одбранбените способности на земјите од континентот, развиваме партнерство во воената и воено-техничката сфера“, рече Путин за време на вториот и последен ден од вториот руско-африкански самит.
„Русија потпиша договори за воено-техничка соработка со повеќе од 40 африкански земји, на кои им доставуваме широк спектар на оружје и опрема.
Путин изјави дека африканските земји добиваат оружје и технологии, некои бесплатно „со цел зајакнување на безбедноста и суверенитетот на земјите“.
Од претставниците на африканските земји се бара активно да учествуваат на воените форуми организирани од Русија, кои се занимаваат со техничките аспекти на оружјето, или вежби за запознавање со опремата и нејзината употреба.
Руската платеничка група Вагнер е подготвена да го зголеми своето присуство во Африка, изјави нејзиниот водач Евгениј Пригожин за африкански вести во аудио интервју објавено на интернет претходно оваа недела.
„Ние не го намалуваме (нашето присуство), згора на тоа, подготвени сме да ги зајакнеме нашите различни контингенти“, изјави Пригожин за камерунската Afrique Media. Телефонското интервју е објавено на YouTube и е прегледано само 1.400 пати до доцна во петокот навечер. Ројтерс не можеше веднаш да ја потврди автентичноста на аудио снимката, ниту дали гласот што се чинеше дека е Пригожинов се слушаше под францускиот превод. Тој во интервјуто рече дека Вагнер ги исполнува сите свои обврски на континентот, и дека е подготвен дополнително да ги развива односите со африканските земји.
Членовите на групата Вагнер учествуваа во некои од најкрвавите конфликти во украинската војна. Сепак, идната улога на групата беше доведена во прашање кога Пригожин неодамна организираше краток бунт, по што Кремљ објави дека платениците на Пригожин ќе ја напуштат Русија за Белорусија, каде што ја обучуваа армијата на земјата.
Сепак, оваа недела тој беше фотографиран во Санкт Петербург за време на руско-африканскиот самит. Пригожин потврди за Afrique Media дека новата ротација на силите на Вагнер неодамна пристигнала во Централноафриканската Република пред уставниот референдум на 30 јули, со кој претседателот Фаустин-Арчанж Туадера би можел да го продолжи својот мандат. „Пристигнаа нови сили, ја контролираме територијата на републиката“, рече Пригожин. Руските платеници, вклучително и многумина од Вагнер, интервенираа во 2018 година на страната на централноафриканската влада за да ја смират граѓанската војна што беснееше од 2012 година.
Улогата на Вагнер во африканските земји е извор на загриженост за западните влади, вклучувајќи ги Франција и САД. Вашингтон ја обвини групата дека извршила широко распространети злосторства и и воведе санкции како криминална организација. Пригожин го побива ова. Во едно интервју, тој рече дека сите активности на Вагнер биле легални и корисни за земјите во кои тој работи и нивните односи со Русија.
