Илјадници Палестинци денеска присуствуваа на погребот на десет сограѓани убиени во израелските напади во претходните два дена во тој град на северот на окупираниот Западен Брег.
Палестинците денеска се збогуваат со своите сограѓани убиени во израелските копнени и воздушни напади врз градот Џенин и тамошниот бегалски камп.
Толпата извикуваше слогани против израелската влада и окупација, како и слогани за поддршка на палестинските групи на отпорот.
Деветмина убиени Палестинци беа погребани на гробиштата во бегалскиот камп, а еден Палестинец беше погребан во неговото родно село Фахме на југот на Џенин.
Израелските сили во понеделникот започнаа жестоки напади врз Џенин, при што загинаа најмалку 12 Палестинци, а беа повредени повеќе од стотина. Меѓу убиените има и четворица малолетници.
Израелската армија утринава се повлече од Џенин оставајќи ги зад себе уништените згради и инфраструктура на палестинскиот град.
