На еврејските посетители и туристи ќе им биде забранет влезот во комплексот на џамијата Ал Акса во Ерусалим до крајот на светиот муслимански месец Рамазан, се наведува во денешното соопштение од кабинетот на израелскиот премиер Бенјамин Нетанјаху.
Минатонеделниот насилен упад на израелската полиција во Ал Акса, која сакаше да ги протера Палестинците од таму, резултираше со ракетни напади врз Израел од Газа, Либан и Сирија.
Особено високи тензии бидејќи Рамазан и Пасха се совпаѓаат
По една година на ескалација на израелско-палестинското насилство, тензиите се особено високи оваа година бидејќи Рамазан и Пасха се совпаѓаат.
Во претходните години, израелската влада донесе одлука да им забрани на немуслиманите да влегуваат во комплексот во последните 10 дена од Рамазан, кој треба да заврши на 20 или 21 април.
Но, екстремно десничарскиот израелски министер за безбедност Итамар Бен-Гвир повика забраната да не се воведува оваа година.
Последната епизода на насилство на Блискиот Исток
Тензиите продолжија и денеска кога двајца Палестинци кои отворија оган врз израелски војници беа убиени на северниот окупиран Западен Брег, што е најновата епизода од спиралата на насилство на Блискиот Исток.
Израелската армија објави дека отворила оган и „неутрализирала двајца вооружени напаѓачи“ кои од своите возила пукале во правец на воената позиција и еврејската населба Илон Море, лоцирана во близина на палестинскиот град Наблус.
Во потера на останатите осомничени војниците во реонот откриле повеќе оружје, меѓу кои и две пушки М-16, се наведува во военото соопштение, а се нагласува дека нема повредени војници.
Западниот Брег, палестинска територија, беше окупиран од Израел во 1967 година. Денес таму живеат речиси три милиони Палестинци, како и 490.000 еврејски доселеници. Тие живеат во населби кои ОН ги сметаат за нелегални според меѓународното право.
(Вести., ба / Индекс)
