Рускиот суд во понеделникот го замрзна целиот имот на Фолксваген во Русија, што е најновата пречка во едногодишните напори на германскиот производител на автомобили да ги затвори своите активности во Русија, пишува Ројтерс.
Фолксваген, заедно со другите странски производители на автомобили, минатата година ја прекина работата во Русија, откако западните земји воведоа санкции без преседан на Москва поради конфликтот во Украина. Фолксваген се обидува да ги продаде своите руски средства, вклучително и неговата фабрика во градот Калуга, која има производствен капацитет од 225.000 возила годишно и е затворена од март 2022 година.
Рускиот производител на автомобили ГАЗ, кој имаше договор за производство на возила на Фолксваген во неговата фабрика во Нижни Новгород, се обиде да ја запре секоја продажба како дел од тужбата против германскиот производител на автомобили за, како што вели ГАЗ, прекршување на договорот откако Фолксваген го раскина договорот за производство во август. Во судските поднесоци, ГАЗ рече дека обидите на Фолксваген да излезе од рускиот пазар ги загрозиле неговите сопствени интереси и бара отштета од 15,6 милијарди рубљи (201,3 милиони долари) за раскинатиот договор.
Рускиот суд во понеделникот се согласи да ги замрзне сите имоти на Фолксваген во Русија во очекување на спор со ГАЗ, покажаа судските документи, што дополнително ги комплицираше напорите на Фолксваген да ги затвори своите руски операции.
Претходно оваа недела, чешкиот производител на автомобили Škoda Auto, дел од групацијата Volkswagen, соопшти дека е во завршна фаза од преговорите за продажба на своите средства во Русија.
Планира да го напушти рускиот пазар
Русија наложува компаниите од „непријателските“ земји – оние кои ја погодија Русија со санкции – мора да добијат одобрение од владина комисија за да ги продадат сите руски средства.
Странските инвеститори стравуваат дека Русија би можела да ги национализира стратешките средства откако беа воведени ограничувањата за продажба.
Минатиот јули, претседателот Владимир Путин издаде декрет за преземање целосна контрола врз проектот за гас и нафта Сахлаин-2 на далечниот исток на Русија, практично преземајќи речиси 50% од проектот од Шел и две јапонски трговски компании.
Другите водечки западни производители на автомобили го напуштија рускиот пазар. Минатата година, францускиот Рено го продаде својот мнозински удел во Автоваз на руски државен субјект за номинален надомест од една рубља – ефективно отпишување на имотот што претходно го проценуваше на 2,2 милијарди евра.
Руската автомобилска индустрија е една од најтешко погодените од одлуката на Москва да испрати десетици илјади војници во Украина минатиот февруари. Индустријата, која претходно се потпираше на западните инвестиции, опрема и делови, падна за невидени 67 отсто минатата година на најниско ниво од распадот на Советскиот Сојуз.
