Фудбалскиот клуб Баерн Минхен во петокот го назначи Халил Алтинтоп за нов спортски директор на клупскиот кампус, а тој на таа позиција ќе го замени Холгер Зајц.
– Навистина се радувам на овој голем предизвик. Би сакал да ви се заблагодарам за укажаната доверба и ќе направам се за да ја продолжиме успешната заедничка работа во Кампусот – изјави Алтинтоп, пренесува Анадолија.
Хасан Салихамиџиќ, член на Извршниот одбор на Баерн, изјави дека клубот има голема доверба во Алтинтоп.
– Во Кампусот е три години, го познава клубот, знае како се одвиваат работите и има повеќе од 15 години искуство како професионален фудбалер. Со својата улога, Халил ќе продолжи да го развива кампусот. Со нетрпение очекувам да работиме заедно и му посакувам се најдобро – изјави Салихамиџиќ.
Алтинтоп ѝ се приклучи на академијата на Баерн во летото 2020 година како помошник тренер за играчите до 16 години, а подоцна раководеше со тимот до 17 години. Во последниве месеци, тој ги координираше младите играчи кои напредуваат во првиот тим и ги надгледуваше позајмените играчи на клубот.
Неговиот брат близнак Хамит е поранешен играч на Баерн Минхен.
Кампусот на ФК Баерн е спортски комплекс кој се наоѓа на северот на Минхен. Баерн го изгради меѓу 2015 и 2017 година. Кампусот располага со објекти за фудбал, кошарка, ракомет и пинг-понг, кои се распространети на површина од 30 хектари, а во него се наоѓа и седиштето на Академијата на клубот од Минхен.
