Словенија на Турција и Сирија ќе им додели хуманитарна помош во износ од 400.000 евра за закрепнување од разорниот земјотрес, соопшти денеска Владата по седницата, јавува Анадолија.
Половина од средствата за хуманитарна помош ќе добие Меѓународната федерација на Црвениот крст и Црвената полумесечина (IFRC) за помош на жителите по земјотресот во погодениот југоисточен дел на Турција. Словенија ќе ги уплати преостанатите средства во Прекуграничниот фонд за Сирија во рамките на финансискиот механизам на Канцеларијата на ОН за хуманитарни прашања (Оча).
Средствата за хуманитарна помош по земјотресот за жителите на Турција и Сирија ќе бидат обезбедени од буџетските резерви на Словенија, објаснуваат од МНР.
Владата во среда на телефонска седница одлучи Словенија преку механизмот на ЕУ во областа на цивилната заштита да и обезбеди материјална помош на Турција во вредност од 451.400 евра.
Покрај тоа, Словенија во понеделникот испрати експерт за логистика во Турција преку Европскиот механизам за цивилна заштита за да ја процени ситуацијата и да се координира. Во вторникот во загрозената област за пребарување и спасување отиде уште една единица за цивилна заштита, поточно тим од седум кучиња спасувачи со водичи и четворица придружници.
