Рускиот министер за надворешни работи Сергеј Лавров денес изјави дека Бразил, Русија, Индија, Кина и Јужна Африка – земјите од БРИКС – ќе разговараат за создавање заедничка валута на претстојниот самит на групата во август во Јужна Африка, пренесува Anadolu.
„Ова е насоката на иницијативите што беа објавени неодамна… за потребата да се размислува за создавање сопствени валути во рамките на БРИКС“, изјави тој на прес-конференцијата со неговиот анголски колега Тете Антонио во главниот град Луанда.
Земјите од БРИКС претходно соопштија дека работат на воспоставување заедничка платежна мрежа за да се намали зависноста од западниот финансиски систем. Земјите-членки, исто така, се повеќе користат локални валути во нивната меѓусебна трговија.
Лавров истакна дека Русија ја поддржува идејата за реформирање на Советот за безбедност на ОН со цел да се зголеми застапеноста на африканските, азиските и латиноамериканските земји. Тој напоменал дека го информирал својот колега од Ангола за ситуацијата во Украина, го привлекол вниманието на активностите на Западот, кој „со години ја користи Украина за да води хибридна војна против Русија“. „Украина беше искористена и за спроведување на отворена колонијална политика кон населението во Украина што зборува руски“, надополнил тој.
Лавров нагласи дека Москва ја започна својата „специјална воена операција“ минатиот февруари со цел да го запре овој „антируски курс“ и да спречи Украина да се претвори во „територија за создавање закани за Русија“. Антонио од своја страна рече дека Ангола го поддржува принципот на немешање и ги повика Русија и Украина да прогласат прекин на огнот и да започнат дијалог.
Вреди да се напомене дека Бразил и Аргентина неодамна најавија почеток на разговори за создавање заедничка валута. Пред самитот на Заедницата на Латинска Америка и Карибите (CELAC) во главниот град на Аргентина Буенос Аирес во вторник, се прошири веста дека Аргентина и Бразил сакаат да создадат заедничка валута, наводно наречена сур (југ). Претходно, претседателите на двете земји изјавија дека ги обновуваат разговорите за ова прашање. Ваквиот потег ќе ја создаде најголемата светска валутна унија по 20-члената еврозона во Европа. Критичарите тврдат дека државите немаат првични услови за успех на проектот и привлекување на други. На самитот во вторникот стана јасно дека во моментов нема планови за монетарна унија; наместо тоа, двете земји сакаат да ги продолжат преговорите за развој на заедничка пресметковна единица која треба да ја олесни трговијата.
