Вицепремиерот на Русија Александар Новак изјави дека извозот на руски гас во Авганистан и Пакистан може да се врши преку размена на гас преку територијата на Иран.
„Ако зборуваме за иднината, тогаш тоа е извоз на гас во Авганистан и Пакистан – или преку користење на инфраструктурни проекти во Централна Азија, или преку размена од територијата на Иран. Односно, ќе го добиваме нивниот гас на југот на земјата, а за возврат ќе ги снабдуваме иранските потрошувачи на северот на земјата“, објасни тој.
Новак повтори дека Русија и Иран би можеле да постигнат договор за размена на нафта и гас – „Очекуваме околу 5 милиони тони нафта годишно, и до 10 милијарди кубни метри гас во првата фаза“.
Рускиот функционер изјави и дека Москва преговара со Казахстан и Узбекистан за зголемување на испораките на гас на пазарите на двете земји. Заменик-министерот за надворешни работи на Русија, Михаил Галузин, изјави дека Астана и Ташкент се подготвени да создадат заедничко вложување со Русија, во рамките на создавање унија за гас.
Тој додаде дека нема поголеми пречки за реализација на идејата, но потребни се бројни системски напори, вклучително и експертски проценки, кои ги преземаат трите земји.
На 28 ноември, лидерите на Русија, Казахстан и Узбекистан разговараа за создавање на трилатерална унија за гас во Кремљ.
