Хрватска од полноќ влегува во Шенген зоната и наместо куната го воведува еврото, кое како официјални пари се користи повеќе од 28 години.
Шенген зоната вклучува територии на 26 европски земји и функционира како област на една држава, со традиционални контроли за оние кои влегуваат и излегуваат од областа, но без контроли на внатрешните граници.
Во Хрватска од полноќ се укинуваат граничните контроли на копнените и поморските гранични премини, а од 26 март на аеродромите.
Покрај тоа, Хрватска од полноќ ќе стане 20-та членка на еврозоната, а куната ќе остане еднакво платежно средство до 14 јануари.
Претседателката на Европската комисија, Урсула фон дер Лајен, рече дека Хрватска може да се гордее со приклучувањето кон еврозоната и Шенген зоната бидејќи ќе привлече инвестиции, ќе помогне да се создадат работни места и да се развие економијата и може да стане европски енергетски центар од обновливи извори. .
„Хрватска на тој начин ја завршува својата целосна европска интеграција“, рече Фон дер Лајен.
Фон дер Лајен е во посета на Хрватска на Нова година, на денот кога се креваат рампите и се укинуваат контролите на границата со Словенија и Унгарија и кога ќе биде пуштена во оптек заедничката европска валута – еврото.
Хрватскиот министер за внатрешни работи Давор Божиновиќ изјави дека влегувањето во Шенген зоната е еден од најголемите политички успеси на Хрватска од влезот во ЕУ.
Влегувањето на Хрватска во најголемата зона на светот без гранични контроли, со околу 420 милиони жители, Божиновиќ го оцени како голема европска придобивка, особено во пограничните региони од Истра, преку северозападна Хрватска до Славонија.
(Vijesti.ba)
