Турскиот претседател Реџеп Таип Ердоган денеска изјави дека се договорил со неговиот руски колега Владимир Путин за бесплатна испорака на жито и вештачко ѓубриво во некои африкански земји.
– Во текот на нашиот разговор, претседателот Путин ми рече дека бесплатно ќе испраќа житни култури во неразвиените земји и ние се согласивме на тоа – изјави Ердоган на меѓународниот саем „Експо“ во Истанбул. – Ќе обезбедиме бродовите натоварени со жито да стигнат до земјите на кои им е потребна, почнувајќи од Џибути, Сомалија и Судан, кои се соочуваат со тешки кризи со храна – додаде Ердоган.
Денешните коментари на Ердоган дојдоа веднаш откако тој и генералниот секретар на Обединетите нации Антонио Гутереш разговараа за продолжување на извозот на жито од пристаништата на Црното Море во телефонски разговор. Договорена на крајот на јули со посредство на Обединетите нации и Турција, Црноморската иницијатива овозможи формирање поморски хуманитарен коридор во Црното Море за извоз на жито и други земјоделски производи.
Договорот досега овозможи извоз на десет милиони тони жито од одредени украински пристаништа, пренесува Ксинхуа.
(Vijesti.ba / ФЕНА)
