Арапските лидери во средата се оддалечија од заземање страна во руската војна во Украина и повикаа на политичко решение на конфликтот што нанесе економски штети на неколку нивни земји, пренесува ДПА.
Завршувајќи го самитот на Арапската лига во Алжир, прв по повеќе од три години поради пандемијата на Ковид-19, лидерите повикаа на политичко решение на конфликтот. Тие изразија „посветеност на принципите на неврзаност и заедничка арапска позиција за војната во Украина заснована на отфрлање на употребата на сила“, се вели во завршната изјава што ја пренесе алжирската државна новинска агенција APS. Тие додаваат дека политичкото решение на кризата треба да биде во согласност со повелбата на ОН и да ги земе предвид „безбедносните грижи“ на заинтересираните страни.
Неколку арапски земји соопштија дека можеби ќе играат посредничка улога во војната, очигледно во обид да одржат добри односи со Москва. Сепак, речиси сите арапски земји минатиот месец гласаа за резолуција на Генералното собрание на ОН со која се осудува руската анексија на четири украински провинции.
Во пораката до дводневниот самит во вторникот, рускиот претседател Владимир Путин рече дека неговата земја е заинтересирана за „сеопфатен развој на понатамошната соработка со Арапската лига и сите нејзини членки со цел зајакнување на регионалната и глобалната безбедност“.
Самитот во Алжир се одржа среде енергетската и прехранбената криза, што произлезе, меѓу другото, и од војната во Украина. Египет, најнаселената земја во арапскиот регион со повеќе од 100 милиони луѓе, е главниот увозник на пченица во светот и неодамна забележа пораст на цените на храната, за што се обвинуваат проблемите со увозот предизвикани од војната. Војната, исто така, придонесе за несигурност на храна во Јемен, сиромашна арапска земја опустошена од долготрајниот конфликт меѓу владата поддржана од Саудиска Арабија и бунтовниците поддржани од Иран.
