Рускиот претседател Владимир Путин денес му се заблагодари на турскиот претседател Реџеп Таип Ердоган за мировните напори на Анкара во Украина, јавува Anadolu Agency (AA).
„Реџеп Тајип Ердоган одигра значајна улога во организирањето на размената на затвореници меѓу Москва и Киев и во потпишувањето на украинскиот договор за жито“, рече Путин, говорејќи на прес-конференција во главниот град на Казахстан, Астана, каде што двајцата лидери се сретнаа во четвртокот.
Тој додаде дека Ердоган одиграл значајна улога во голем број прашања, вклучувајќи ја и размената на затвореници, наведувајќи дека претседателот на Турција „лично е вклучен во овие прашања, за што му се благодарни“.
„Тој беше активен учесник во постигнувањето договор за извоз на жито (од Украина)“, рече Путин, додавајќи дека вчера разговарале за потребата житото да оди во најсиромашните земји. Ја изрази благодарноста на Москва за мировното посредување на Анкара во услови на конфликт меѓу Русија и Украина, додавајќи дека Обединетите Арапски Емирати исто така понудиле помош и работеле на помирување на двете земји.
Путин истакна дека Русија останува отворена за мировни преговори со Украина, посочувајќи на разговорите одржани во Истанбул претходно оваа година, кога рече дека се блиску до изнаоѓање компромис. Тој додаде дека Русија нема за цел да ја уништи Украина и дека нејзината „специјална воена операција“ е започната за да се справи со воените предизвици. „Ова што се случува денес е, најблаго речено, непријатно, но подоцна сето тоа би го добиле под полоши услови. Затоа, правиме се како што треба“, нагласи тој.
Путин најави дека делумната воена мобилизација која ја најави на 21 септември ќе биде завршена во рок од две недели и дека нема да има дополнителни мерки за мобилизација. „Повеќе од 220.000 луѓе веќе се пријавиле за служба како дел од мобилизацијата“, рече рускиот претседател, додавајќи дека се потребни дополнителни сили за зајакнување на фронтот долг преку 1.000 километри. За луѓето што ја напуштаат Русија за да избегнат регрутирање, Путин рече дека секој случај треба да се оценува посебно, без да се стигматизираат сите. Тој призна дека лидерите на Комонвелтот на независни држави (ЗНД) се загрижени за војната во Украина, но рече дека тоа на никаков начин не влијае на односите меѓу Русија и земјите од Централна Азија. „Ситуацијата во Украина е предмет на дискусија, но таа во никој случај не влијае на природата, квалитетот и длабочината на односите со земјите од Централна Азија“, рече Путин.
Тој додаде дека има и други конфронтации меѓу постсоветските земји, вклучувајќи ги и оние меѓу Ерменија и Азербејџан, како и Киргистан и Таџикистан. Тој рече дека разговарал за граничните спорови на состанокот со лидерите на Киргистан и Таџикистан на маргините на самитот на ЗНД на кој присуствуваше во петокот во Астана. Овие земји бараа посредување околу тензиите, а Путин, како што вели, предложи да дадат предлози за потенцијално меѓусебно решение. „Во оваа фаза не е лесно да се најде заеднички јазик, но успеавме да се договориме дека ќе бидат преземени сите мерки за да се спречи продолжување на конфликтот како и за враќање на бегалците. Се договоривме документот да ја претстави својата визија за решавање на проблемот, а ние ќе ја претставиме нашата визија како можеме да помогнеме“, рече тој. На прашањето дали ќе оди на претстојниот самит на Г20 и дали има намера таму да се сретне со американскиот претседател Џо Бајден, Путин рече дека допрва треба да донесе одлука.
Во врска со минатонеделната експлозија на мостот Керч, кој е единствената копнена врска на Русија со Крим, украинскиот полуостров што Русија незаконски го анектираше во 2014 година, Путин рече дека руските безбедносни сили добиле инструкции да ги зајакнат безбедносните мерки по експлозијата. Тој рече и дека доколку се точни информациите дека се транспортирале експлозиви до мостот на коридорот за жито, иднината на овој хуманитарен коридор ќе биде доведена во прашање. „Сепак, нема податоци за потврда на овие извештаи“, рече тој.
