Албанија ги прекинува дипломатските односи со Иран и им нареди на иранските дипломати и персоналот на амбасадата да си заминат во рок од 24 часа по истрагата за сајбер нападот во јули, изјави премиерот Еди Рама.
„Владата веднаш одлучи да ги прекине дипломатските односи со Исламската Република Иран“, истакна Рама во видео изјава испратена до медиумите. „Овој екстремен одговор … е целосно пропорционален на сериозноста и ризикот од сајбер напад што се закануваше да ги парализира јавните услуги, да ги избрише дигиталните системи и да ги хакира владините записи, да ги украде владините електронски комуникации на интранет и да предизвика хаос и несигурност во земјата. “, рече Рама.
Од иранската амбасада во Тирана нема реакција. Двете земји имаат затегнати односи од 2014 година, кога Албанија прифати околу 3.000 членови на опозициската група во егзил, Иранската народна муџахединска организација, позната и по нејзиното персиско име Муџахедин-е-Калк, кои се населиле во камп во близина на Драч. Албанија претходно објави дека спречила бројни планирани напади на ирански агенти против иранска опозициска група. „Длабоката истрага ни обезбеди неоспорни докази дека сајбер нападот врз нашата земја бил оркестриран и спонзориран од Исламската Република Иран преку вмешаност на четири групи кои ја извршиле агресијата“, рече Рама.
