Официјални лица за човекови права соопштија дека војната дополнително ја влоши нивната ситуација и ја повикаа украинската влада да ги исправи своите „историски грешки“. Децата со попреченост се злоупотребувани и запоставени во институциите низ Украина, предупредија експертите на ОН, пишува Би-би-си.
Нивната изјава доаѓа откако истрагата на BBC News откри широко распространета злоупотреба во сиропиталиштата во земјата, вклучувајќи тепање и малтретирање. Пред војната, повеќе од 100.000 деца и млади живееле во институции.
Кога Русија изврши инвазија во февруари, илјадници лица со попреченост беа исфрлени од институциите и вратени назад кај нивните семејства. Експертите на ОН велат дека се оставени без соодветна поддршка, што ги става во ризик од понатамошно напуштање, да живеат на улица или да станат жртви на трговија со луѓе. Сепак, илјадници сè уште живеат во огромната мрежа на Украина од речиси 700 институции. Иако овие места се нарекуваат „сиропиталишта“, 90% од оние што живеат таму имаат семејства.
BBC News доби пристап до пет институции и наиде на широко распространето вознемирување и малтретирање – вклучително и тинејџери кои беа задржани, а возрасните беа оставени да лежат во креветчиња со години. Инспекторите за човекови права велат дека Украина не треба да се приклучи на Европската унија додека не ги затвори тие институции.
Пред војната со Русија, украинската влада соопшти дека ќе го реформира системот. Приливот на евакуирани од исток изврши дополнителен притисок врз системот, но начинот на кој луѓето се третираат во украинските институции датира многу пред руската инвазија, пишува Би-Би-Си. Еден од експертите, Џерард Квин, специјален известувач на ОН за правата на лицата со попреченост, рече дека ова е проблем кој одамна и претходи на војната – и дека е време Украина да го притисне копчето „ресетирање на иднината“.
„Сите војни откриваат историски грешки во жарот на моментот, а институционализацијата е една од нив“, рече тој. „Време е да се дејствува, да се притисне копчето за ресетирање кон иднината. За тоа ни треба јасна посветеност на украинската влада да стави крај на својот систем на институционализација“.
Извор: BBC
