Компаниите на руската државна корпорација „Роскосмос“ почнаа со сериско производство на интерконтинентални балистички ракети „Сармат“, а првиот ракетен полк ќе биде на борбена задача до крајот на 2022 година, изјави генералниот директор на „Роскосмос“, Дмитриј Рогозин.
„Веќе започнавме сериско производство на ракети. Поаѓаме од фактот дека до крајот на годината треба да го ставиме првиот полк на борбена задача во Ужур, во Краснојарската област“, изјави Рогозин за телевизискиот канал „Русија 24“. Како што истакна, „Роскосмос“ во моментов се подготвува за вториот тест на „Сармат“.
Претходно рускиот претседател Владимир Путин изјави дека првата ракета „Сармат“ ќе и биде достапна на армијата до крајот на годинава. Според карактеристиките, дометот и брзината на летот, ракетата „Сармат“ нема пандан во светот. Може да напаѓа цели преку Северниот и Јужниот Пол, совладувајќи ги системите за ракетна одбрана, а исто така може да погоди цели насекаде во светот, тврдат руски експерти. Првото лансирање ракета се случи во април.
