ЕДРЕНЕ, Турција (АА) ‒ Оние кои ја напуштија Украина откако Русија започна војна во земјата продолжуваат да доаѓаат во Турција, бидејќи, како што велат, ја сметаат за безбедна.
Украински семејства, возејќи ги своите возила од градовите каде што претходно живееле, влегуваат во Турција преку границата Капикуле со Бугарија.
Доналд Хофербер е еден од оние кои дошле во Турција со неговата сопруга Лили и децата Александар, Мајкл и Ана.
Семејството Хофербер кое ги остави пријателите на бугарскиот граничен премин „Капитан Андреево“, влезе во Турција пеш со своите куфери.
Хофербер рече дека оделе пеш осум километри од Одеса за да стигнат до границата и дека нападите врз Украина се многу чести.
„Хеликоптерите ги нападнаа мостовите. Бомбите паднаа многу блиску до нашиот дом.“
„Следниот ден откако ја напуштивме нашата куќа, руски тенкови стигнаа до нашата куќа, но Украинската армија таму онеспособи 20 руски тенка“, рече тој.
Истакнувајќи дека дошле во Турција бидејќи имале пријатели во Истанбул, Хофербер рече: „Мислам дека Турција е безбедна за нас. Размислувам да останам во Истанбул околу еден месец.“
Друг украински државјанин, Александар Дрогов, кој дошол во Турција со своето семејство, исто така тврди дека Русија бомбардира цивилни населби.
Зборувајќи за големиот број луѓе кои останаа среде нападот, Дрогов забележа: „Граѓаните на Русија не знаат што се случува сега. Тие веруваат дека ова е само привремен напад. Тие не знаат за војната бидејќи медиумите се многу добро контролирани во Русија.“
„Мојата куќа беше многу блиску до полската граница. Луѓето ги бранат градовите во кои живеат“, рече тој.
Тој, исто така, рече дека ќе остане во Турција, додавајќи дека целосно верува дека Украина ќе победи во оваа војна.
„Јас мислам дека Украина има една од најмоќните армии. Не се сомневам дека ќе победиме.“
„Турција се однесуваше многу добро со украинскиот народ во овој процес, и затоа се засолнивме во Турција“, додаде тој.
Руската војна над Украина, која започна на 24 февруари, се сретна со меѓународна осуда, а Европската Унија, Велика Британија и САД, меѓу другите земји, на Москва ѝ воведоа строги санкции.
Преку 2.000 цивили се убиени во Украина откако започна војната, според украинските власти.
Повеќе од 874.000 луѓе заминаа од Украина во соседните земји, според Агенцијата на ОН за бегалци.
Anadolu Agency
