Турскиот министер за надворешни работи, Мевлут Чавушоглу, повика на смиреност и деескалација во услови на спорот меѓу Русија и Украина, јавува Агенција Анадолија (АА).
„Бевме во контакт со двете страни и советуваме смиреност и деескалација“, изјави Чавушоглу за новинарите пред вториот ден од состанокот на министрите за надворешни работи на НАТО во главниот град на Латвија, Рига.
Чавушоглу рече дека разговарал со министерот за надворешни работи на Русија, Сергеј Лавров и министерот за надворешни работи на Украина, Дмитро Кулеба.
„Турскиот претседател Реџеп Таип Ердоган в петок ќе разговара со неговиот руски колега Владимир Путин“, додаде тој.
Чавушоглу рече дека повторно ќе се сретне со Кулеба за време на состанокот на НАТО денеска, како и со Лавров, за време на дводневниот 28. министерски состанок на Организацијата за безбедност и соработка во Европа (ОБСЕ), кој започнува в четврток.
„Значи, ние сме во контакт со двете страни и советуваме смиреност и деескалација“, рече турскиот министер за надворешни работи.
На прашањето во врска со можните меѓународни санкции за Русија, Чавушоглу изјави: „Како Турција, ние веруваме дека санкциите нема да ги решат проблемите.“
Тврдејќи дека санкциите не функционирале во минатото, Чавушоглу рече: „Наместо санкции… треба да имаме смислено одвраќање.“
„Како Турција, она во што веруваме е воспоставување вистинска рамнотежа помеѓу одвраќање и дијалог. Никој не може да ѝ помогне на Украина или на која било друга земја само преку санкции.“
На прашањето за можното членство на Украина во НАТО, Чавушоглу рече: „Турција е за проширување, Турција е за членство на другите соседни земји.“
„Ние и нашиот претседател Реџеп Таип Ердоган постојано го нагласувавме ова за време на самитите и министерските состаноци на НАТО.“
Коментарите на Чавушоглу следуваа откако највисокиот функционер на НАТО во вторникот изјави дека Русија ќе се соочи со сериозни последици доколку употреби сила против Украина.
„Ја повикуваме Русија да биде транспарентна, да деескалира и да ги намали тензиите“, рече Јенс Столтенберг на прес-конференцијата по првиот ден од Конференцијата на министрите за надворешни работи на НАТО.
Вториот ден од состанокот на НАТО започна со утринска сесија на највисоките дипломати, фокусирана на Русија по неодамнешното воено засилување од страна на Москва во близина на украинската граница. На седницата присуствуваат и министерот за надворешни работи на Украина, Дмитри Кулеба и министерот за надворешни работи на Грузија, Давид Залкалијани.
По седницата за Авганистан во текот на денот, страните ќе разговараат за ситуацијата на Западен Балкан со учество на министрите за надворешни работи на Финска и Шведска, како и на шефот за надворешна политика на ЕУ, Жозеп Борел.
„Anadolu Agency“
