Замотани во ќебиња и фолии, мигранти минаа цела ноќ во шума во граничното подрачје меѓу Белорусија и Полска, а четири лица починаа од смрзнување, со оглед на ниските температури. Тие, буквално, секој ден ја минуваат границата меѓу двете земји од кои се протерувани од полицијата. Нивна желба е да влезат во Европската Унија, поточно во Германија. Додека белорускиот претседател Александар Лукашенко е води војна со Европската Унија, а членките на ЕУ силно ги осудуваат неговите постапки, илјадници луѓе се незаштитени и препуштени на милост и немилост на граничната полиција.
Напнатата ситуација на границата меѓу Белорусија и Полска ескалира во текот на вчерашниот ден, кога белоруската војска испрати околу 3.000 мигранти до границата, со намера да ги насочи кон Полска. На тоа следеше итна реакција на полските власти кои целосно ја затворија границата, додека 12.000 војници беа распоредени во нејзина близина.
[embedyt] https://www.youtube.com/watch?v=90b-Wt4ShtI[/embedyt]
Денот мина прилично бурно, а во доцните вечерни часови медиумите пренесоа дека дошло до пукотници на полска страна. Урсула фон дер Лајен ги осуди постапките на Белорусија и ги повика членките на ЕУ да воведат дополнителни економски санкции за земјата, додека полските власти ги протолкуваа постапките на Лукашенко како нова провокација и напад врз имотот на ЕУ. Во таквите препукувања најмногу страдаат оние се најдоа без намера во нив.
„Секој ден влегуваме во Полска, а тие нè враќаат назад. Нè одведуваат ноќе и нѝ велат да ја минеме границата. Ветуваат дека на таа страна нема полска полиција и дека може да одиме во тој правец, само мора да ја минеме жицата, изјави еден од мигрантите за „Би-Би-Си“, замотан во фолија во шумата со промрзнати усни и тешкотии во зборувањето.
Активистите моментно се наоѓаат на границата каде им помагаат на гладните и замрзнати мигранти. Како што велат, не може да се знае колку од нив се болни, гладни и повредени. Како што изјави еден активист, не се работи за политика, туку за човечки животи.
Нема симпатии од ниту една страна, велат од спорната граница. Варшава синоќа ги обвини белоруските војници дека туркаат мигранти преку граница, како и дека во одреден момент сами минале на територијата на Полска. Иако армијата моментално се повлекува од пограничната област, Полска ја зголеми борбената готовност и порача дека во секој момент ќе биде подготвена за акција. Спротивно на тоа, Минск ги отфрли обвинувањата и ја обвини Полска за создавање на конфликт.
