Целосното излегување на Велика Британија од Европската Унија (ЕУ) беше соопштено во 23:00 часот по локално време со ѕвонењето на камбаните на „Биг бен“. Поради епидемијата од новиот вид коронавирус (Ковид-19) немаше организиран настан, пренесува Агенција Анадолија (АА).
Започна нова ера за Велика Британија, која стана членка на ЕУ во 1973 година. Иако ја напушта Унијата на 31 јануари 2020 година, Велика Британија ќе продолжи да ги спроведува правилата на Брисел.
Новите регулативи меѓу двете страни во областите како што се трговијата, патувањата, имиграцијата, законот и безбедноста стапија во сила.
Од сега понатаму, страните ќе ги продолжат трговските односи според Договорот за слободна трговија потпишан на 30 декември, а Велика Британија ќе остане надвор од надлежноста на судовите на ЕУ.
Британците го загубија правото на постојан престој и работни дозволи во земјите на ЕУ.
Од друга страна, граѓаните на земјите членки на ЕУ ќе можат да живеат во Велика Британија само доколку ги исполнуваат потребните услови за имиграција.
Сѐ уште постои неизвесност за тоа што ќе се случи во банкарскиот и услужниот сектор, кои имаат важно место во британската економија.
Премиерот Борис Џонсон во својата порака за Новата година истакна: „Ова е прекрасен момент за земјата. Слободата ја зедовме во наши раце и останува на нас тоа да го искористиме максимално.“
– Процесот на Брегзит –
Обединетото Кралство, кое се состои од Англија, Велс, Северна Ирска и Шкотска, одлуката за Брегзит ја донесе на референдумот за ЕУ одржан во јуни 2016 година, со 52 проценти „за“.
Велика Британија, која официјално ја напушти ЕУ на 31 јануари, водеше сеопфатни преговори со Унијата за билатералните односи, особено на полето на трговијата.
Страните минатата недела постигнаа договор за продолжување на трговијата без царини и квоти од 1 јануари 2021 година.
